O‘zbekistondagi istirohat bog‘larida joylashgan 574 ta attraksion texnik nosoz deb topildi

O‘zbekistondagi istirohat bog‘laridagi 574 ta attraksion texnik nosoz deb topildi, ularning faoliyati cheklanib, ishlatmaslik choralari ko‘rildi. Bu haqda AOKA o‘tkazilgan brifingda Sanoat xavfsizligi davlat qo‘mitasi axborot xizmati rahbari Malika Mirjamolova ma’lum qildi.

Ma’lum qilinishicha, ishchi guruhlar tomonidan respublikadagi mavjud 143 ta madaniyat va istirohat bog‘idagi 1879 ta har xil turdagi attraksion (kichik attraksionlar ham) qayta o‘rganib chiqilgan.

Ushbu attraksionlarning 450 ga yaqini istirohat bog‘lari tasarrufida bo‘lsa, qolganlari xususiy tadbirkorlarga tegishli bo‘lib shartnoma asosida foydalaniladi.

O‘rganishlar natijalari bo‘yicha 574 ta texnik nosoz deb topilgan attraksionlar faoliyati cheklanib, ishlatmaslik choralari ko‘rilgan. Aniqlangan kamchiliklar yuzasidan tegishli dalolatnomalar rasmiylashtirilib, kamchilik aniqlangan attraksionlarni foydalanmaslik sharti hamda kamchiliklar bartaraf qilingunga qadar to‘xtatib qo‘yish bo‘yicha mahalliy davlat organlariga axborotnomalar hamda madaniyat va istirohat bog‘lari rahbarlariga 116 ta taqdimnoma berilgan.

Sanoat xavfsizligi davlat qo‘mitasi va Texnik jihatdan tartibga solish agentligi bilan birgalikda “Attraksionlar xavfsizligi to‘g‘risidagi umumiy texnik reglamentni tasdiqlash haqida”gi Vazirlar Mahkamasining qarori loyihasi ishlab chiqilib, “Project.gov.uz” tizimi orqali manfaatdor vazirlik va idoralar bilan kelishilgan, Adliya vazirligidan huquqiy ekspertiza natijalari bo‘yicha ijobiy xulosa olingan va Vazirlar Mahkamasiga kiritilgan.

Shuningdek, Sanoat xavfsizligi davlat qo‘mitasining “Attraksionlardan xavfsiz foydalanish qoidalarini tasdiqlash haqida”gi qarori loyihasi idoraviy normativ-huquqiy hujjat sifatida ishlab chiqilgan. Mazkur loyiha vazirlik va idoralar bilan kelishish uchun yuborilgan. Hozirda “Attraksionlardan xavfsiz foydalanish qoidalarini tasdiqlash haqida”gi qaror loyihasi vazirlik va idoralar tomonidan bildirilgan taklif va e’tirozlarni inobatga olgan holda Adliya vazirligiga kiritish uchun qayta ko‘rib chiqilmoqda.

Eslatib o‘tamiz, 2019-yilda Jizzaxda attraksion qulashi oqibatida 20 yoshli qiz halok bo‘lgan, Namangandagi ko‘ngilochar istirohat bog‘ida 18 yoshli qiz attraksionda olgan tan jarohati tufayli vafot etgandi.