Inkuzart taxallusi bilan ijod qilayotgan ko‘cha rassomi Abdurahmon Chilonzor tumanidagi Operetta teatri yaqinidagi devorga yangi strit-artini chizish jarayoni tasvirlangan videoni e’lon qildi.
Yangi strit-artda qadimiy yunon titani, yelkasida osmon gumbazini ko‘tarib turuvchi Atlant tasvirlangan. Inkuzart’ning tasvirida esa Atlant bir qop shakarni ko‘tarib turibdi va qo‘liga ichida insulin bor “kapelnitsa” ulangan.
“Diabetga navbatsiz”, — deya Inkuzart o‘z ijodiga izoh bergan.
Eslatib o‘tamiz, 2021-yilning sentabr boshida @inkuzart O‘zbekiston avtomobil bozoridagi monopoliyaga bag‘ishlangan strit-art chizgandi. Unda mashina uchun uzun navbat va navbat boshida qizil shapkali inson tasvirlangandi. Keyinroq ushbu tasvir to‘liq o‘chirib tashlangan, poytaxt hokimligi va “O‘zavtosanoat” bu ishga aloqasi yo‘qligini ma’lum qilgan edi. Noyabrda esa ko‘cha rassomining Toshkentda benzin narxi oshishiga bag‘ishlangan strit-art o‘chirib tashlangandi. 2022-yilning 18-fevral kuni esa Inkuzart’ga tegishli turli formulalar bilan devorga chizilgan Albert Eynshteynning portreti bo‘yab tashlangan. Chilonzor tuman hokimligi strit-artining o‘chirilishiga tuman hokimining buyrug‘i emas, mahalla faollari sababchi bo‘lganini ma’lum qilgan.
Izoh (0)