O‘zbekistonda 2022-yilda maktabgacha ta’lim tizimidagi 17 mingdan ortiq pedagogning malakasi oshiriladi

AOKAda o‘tkazilgan matbuot anjumanida Maktabgacha ta’lim vazirligi mutasaddilari MTTlardagi rahbar va pedagog kadrlarning malakasini oshirish masalasiga to‘xtaldi.

Qayd etilishicha, 2021-yilda 14029 nafar pedagog kadrlarning malakasi oshirilgan. Shundan 8198 nafar tarbiyachilar hisoblanadi. Shuningdek, pedagog kadrlar sifatini oshirish maqsadida qisqa muddat o‘quv kurslari tashkil etilib, mazkur kurslarda 50 mingdan ziyod pedagog kadrlar, shundan 22 mingdan ziyodi oilaviy NMTT pedagog kadrlari ishtirok etgan.

2022-yilda maktabgacha ta’lim tizimida 17288 nafar pedagog kadrning malakasini oshirish rejalashtirilgan. Ularning 8600 nafari — maktabgacha ta’lim tashkilotlari direktor va mutaxassislarini qayta tayyorlash va ularning malakasini oshirish institutida, 7500 nafari — XTV tasarrufidagi Xalq ta’limi xodimlarini qayta tayyorlash va ularning malakasini oshirish hududiy markazlarida, 1188 nafari — Jismoniy tarbiya va sport mutaxassislarini ilmiy-metodik ta’minlash, qayta tayyorlash va malakasini oshirish institutida malaka oshirishi ko‘zda tutilgan.

Joriy yil 1-choragida 4 652 nafar maktabgacha ta’lim tashkiloti rahbar va pedagog kadrlari malakasi oshirilgan.

Namangan va Qo‘qon pedagogika kollejlarida tajriba-sinov tariqasida Maktabgacha ta’lim klasterlari tashkil etilgan. Mazkur klasterlarda jami 1022 nafar rahbar va pedagog kadrlarning malakasi oshirilgan.