Inkuzart тахаллуси билан ижод қилаётган кўча рассоми Абдураҳмон Чилонзор туманидаги Оперетта театри яқинидаги деворга янги стрит-артини чизиш жараёни тасвирланган видеони эълон қилди.
Янги стрит-артда қадимий юнон титани, елкасида осмон гумбазини кўтариб турувчи Атлант тасвирланган. Inkuzart’нинг тасвирида эса Атлант бир қоп шакарни кўтариб турибди ва қўлига ичида инсулин бор «капелница» уланган.
«Диабетга навбатсиз», — дея Inkuzart ўз ижодига изоҳ берган.
Эслатиб ўтамиз, 2021 йилнинг сентябрь бошида @inkuzart Ўзбекистон автомобиль бозоридаги монополияга бағишланган стрит-арт чизганди. Унда машина учун узун навбат ва навбат бошида қизил шапкали инсон тасвирланганди. Кейинроқ ушбу тасвир тўлиқ ўчириб ташланган, пойтахт ҳокимлиги ва «Ўзавтосаноат» бу ишга алоқаси йўқлигини маълум қилган эди. Ноябрда эса кўча рассомининг Тошкентда бензин нархи ошишига бағишланган стрит-арт ўчириб ташланганди. 2022 йилнинг 18 февраль куни эса Inkuzart’га тегишли турли формулалар билан деворга чизилган Алберт Эйнштейннинг портрети бўяб ташланган. Чилонзор туман ҳокимлиги стрит-артининг ўчирилишига туман ҳокимининг буйруғи эмас, маҳалла фаоллари сабабчи бўлганини маълум қилган.
Изоҳ (0)