Qashqadaryoda kameradosh ayolni 25,5 mln so‘mga tushirgan shaxs ushlandi

Qashqadaryo viloyati Qarshi shahrida qamoqdagi sherigini aldab, pullarini qo‘lga kiritgan shaxs ushlandi. Bu haqda Tergov departamenti xabar qildi.

Qayd etilishicha, B.Y. ismli ayol (43 yoshli) tuman IIB boshlig‘i nomiga ariza bilan murojaat qilgan. Unda 2021-yil iyun oyida u tergov hibsxonasida E.S. (45 yoshli) bilan birga sudga qadar bir kamerada saqlangan vaqtida tanishib qolganini aytgan. E.S. ayolga Jinoyat kodeksning 168-moddasi 2-qismi “a” bandi (firibgarlik) bilan sudlanayotgani va yetkazilgan moddiy zararni qoplab bersagina, qamoqdan chiqib keta olishini aytgan. Agar unga yordam bersa, uni ham tanishlari orqali qamoqdan chiqarib olishini bildirib. B.Y.dan qizi orqali 18 million so‘m moddiy zarar uchun pul olib, qamoqdan chiqib ketgan.

Shundan so‘ng, B.Y.ning qizi oldiga borib, onasining ishlarini hal qilish uchun deb, jami 7,5 million so‘m pulni aldov yo‘li bilan qo‘lga kiritgan. Bergan va’dasini bajarmay, olgan pullarini qaytarib bermagan. Fuqaro undan pullarini undirishni va unga nisbatan qonuniy chora ko‘rilishini so‘ragan.

Holat yuzasidan Jinoyat kodeksning 168-moddasi 3-qismi “b” bandi (firibgarlik) bilan jinoiy ish qo‘zg‘atilgan. Hozirda tergov davom etmoqda.