Toshkentning Chilonzor tumanida turli formulalar bilan devorga chizilgan Albert Eynshteynning portreti bo‘yab tashlandi.
Inkuzart taxallusi bilan ijod qilayotgan ko‘cha rassomi Eynshteynning qo‘l qovushtirib turgan holati va uning ikki tarafida juda ko‘plab formulalari bor strit-art 2020-yilning avgustida Chilonzor tumani 2-dahasi 103-maktab ro‘parasiga chizgan edi. Rustam Husanov ismli turoperator o‘zining Facebook’dagi sahifasiga “uni bolalar, aholi yaxshi ko‘rardi, unga ekskursiyalar uyushtiriladi”, deya yozib qoldirgan. Uning ta’kidlashicha, oldinlari ushbu devorga haqoratli so‘zlar yozilgan bo‘lgan.
Kadr: Telegram / @inkuzart
Inkuzart o‘zining Telegram’dagi kanaliga “Yeralash” yumoristik kinojurnalining musiqasidan foydalanilgan rolikni joylagan bo‘lib, unda rassom graffitini chizgani, keyin esa ishchilar devorni bo‘ylab tashlagani tasvirlangan. “Chilonzor hokimiga rahmat”, — deyiladi video izohida.
“Gazeta.uz”ning Chilonzor hokimligiga tayanib xabar berishicha, bino noqonuniy qurilgan inshoot bo‘lgani sabab buzilishi kerakligi uchun strit-art o‘chirilgan. Tuman hokimining arxitektura, qurilish va kommunikatsiyalarni rivojlantirish masalalari bo‘yicha o‘rinbosari Abror Ahmedovning so‘zlariga ko‘ra, surat muallifiga “boshqa bir qulay joy” taklif etiladi.
Telegramdagi “Kurbanoff.net” kanali ushbu holatga munosabat bildirib “Nima graffiti chizilgan noqonuniy inshootlarni buzish taqiqlanganmi? Agar binoni buzish kerak bo‘lsa nega graffiti o‘chirildi, birga buzib tashlasa ham bo‘ladi-ku?”, deya savol qoldirgan.
Eslatib o‘tamiz, 2021-yilning sentabr boshida @inkuzart O‘zbekiston avtomobil bozoridagi monopoliyaga bag‘ishlangan strit-art chizgandi. Unda mashina uchun uzun navbat va navbat boshida qizil shapkali inson tasvirlangandi. Keyinroq ushbu tasvir to‘liq o‘chirib tashlangan, poytaxt hokimligi va “O‘zavtosanoat” bu ishga aloqasi yo‘qligini ma’lum qilgan edi. Noyabrda esa ko‘cha rassomining Toshkentda benzin narxi oshishiga bag‘ishlangan strit-art o‘chirib tashlangandi.
