O‘zbekistonda viloyat hokimlari orasida birinchi bo‘lib koronavirusga chalingan Surxondaryo viloyati hokimi To‘ra Bobolov internetda o‘zining vafot etgani haqida xabar tarqalganini betoblik sabab ko‘proq yotib qolishi bilan bog‘liq bo‘lishi mumkinligini aytdi. Surxondaryo hokimi bu haqda “Daryo” bilan suhbatda gapirib berdi.
“Men bu haqdagi xabarga e’tibor ham bermadim, to‘g‘risi. Yozishgan ekan, ammo noto‘g‘ri axborot uchun javobgarlikka ham tortildi”, — deydi To‘ra Bobolov.
Surxondaryo hokimi bilib-bilmay, tushunib-tushunmay yozadigan blogerlar ham borligi bois shunaqa xabarlar tarqalayotganini aytmoqda.
“Ha, endi shunaqa blogerlar ham bor. Bilib-bilmay, tushunib-tushunmay yozadi”, — dedi viloyat hokimi.
To‘ra Bobolovning aytishicha, u sog‘lig‘i yaxshiligi haqida videomurojaat qilayotganda “betoblik sabab ko‘p yotib qolganim uchun mendan xavotir olishyapti”, deb o‘ylagan.
“O‘sha kuni sog‘lig‘im haqida videomurojaat qilishimni aytib, oddiy telefonga yozib olishdi. To‘g‘risi, men buni betobligim sabab ko‘p yotib qolganim uchun xavotirlanishyapti deb o‘ylagandim. To‘rt-besh kundan keyin bu haqda o‘qidim va bildim. Lekin e’tibor ham bermadim”, — dedi To‘ra Bobolov.
To‘ra Bobolovning koronavirusga chalingani haqidagi gaplar 2020-yilning iyul oyining birinchi qismida paydo bo‘lgandi. Hokim yig‘ilishlarda bevosita qatnashmay, Zoom dasturi orqali ishtirok etayotgandi. O‘sha paytda viloyat hokimligi matbuot xizmati Bobolovning COVID-19 yuqtirib olganini rad etgandi. Ammo 18-iyulga kelib Sog‘liqni saqlash vazirligi Qoraqalpog‘iston Jo‘qorg‘i Kengesi raisi Musa Yerniyazov Nukusda va Surxondaryo hokimi To‘ra Bobolov Toshkentda koronavirusdan davolanayotganini ma’lum qildi. Bobolovning hatto vafot etgani haqida ham xabarlar paydo bo‘ldi, ammo hokimning o‘zi videomurojaat bilan chiqdi va ahvoli yaxshi ekanligini bildirdi. Uning o‘limi haqida xabar tarqatganlar jazoga tortildi.
Izoh (0)