Ўзбекистонда вилоят ҳокимлари орасида биринчи бўлиб коронавирусга чалинган Сурхондарё вилояти ҳокими Тўра Боболов интернетда ўзининг вафот этгани ҳақида хабар тарқалганини бетоблик сабаб кўпроқ ётиб қолиши билан боғлиқ бўлиши мумкинлигини айтди. Сурхондарё ҳокими бу ҳақда «Дарё» билан суҳбатда гапириб берди.
«Мен бу ҳақдаги хабарга эътибор ҳам бермадим, тўғриси. Ёзишган экан, аммо нотўғри ахборот учун жавобгарликка ҳам тортилди», — дейди Тўра Боболов.
Сурхондарё ҳокими билиб-билмай, тушуниб-тушунмай ёзадиган блогерлар ҳам борлиги боис шунақа хабарлар тарқалаётганини айтмоқда.
«Ҳа, энди шунақа блогерлар ҳам бор. Билиб-билмай, тушуниб-тушунмай ёзади», — деди вилоят ҳокими.
Тўра Боболовнинг айтишича, у соғлиғи яхшилиги ҳақида видеомурожаат қилаётганда «бетоблик сабаб кўп ётиб қолганим учун мендан хавотир олишяпти», деб ўйлаган.
«Ўша куни соғлиғим ҳақида видеомурожаат қилишимни айтиб, оддий телефонга ёзиб олишди. Тўғриси, мен буни бетоблигим сабаб кўп ётиб қолганим учун хавотирланишяпти деб ўйлагандим. Тўрт-беш кундан кейин бу ҳақда ўқидим ва билдим. Лекин эътибор ҳам бермадим», — деди Тўра Боболов.
Тўра Боболовнинг коронавирусга чалингани ҳақидаги гаплар 2020 йилнинг июль ойининг биринчи қисмида пайдо бўлганди. Ҳоким йиғилишларда бевосита қатнашмай, Zoom дастури орқали иштирок этаётганди. Ўша пайтда вилоят ҳокимлиги матбуот хизмати Боболовнинг COVID-19 юқтириб олганини рад этганди. Аммо 18 июлга келиб Соғлиқни сақлаш вазирлиги Қорақалпоғистон Жўқорғи Кенгеси раиси Муса Ерниязов Нукусда ва Сурхондарё ҳокими Тўра Боболов Тошкентда коронавирусдан даволанаётганини маълум қилди. Боболовнинг ҳатто вафот этгани ҳақида ҳам хабарлар пайдо бўлди, аммо ҳокимнинг ўзи видеомурожаат билан чиқди ва аҳволи яхши эканлигини билдирди. Унинг ўлими ҳақида хабар тарқатганлар жазога тортилди.
Изоҳ (0)