Avvalroq Surxondaryo viloyati hokimi To‘ra Bobolovning koronavirusga chalinib, vafot etgani haqida xabarlar tarqalgan edi, viloyat hokimligi mazkur xabarlarni rad etgandi.
Foto: “Daryo”
“Diyor 24”ning yozishicha, mazkur holat viloyat prokuraturasi tomonidan tezkorlik bilan nazoratga olinib, holat bo‘yicha tergovga qadar tekshiruv harakatlari o‘tkazilishi ta’minlandi. Tekshirish natijasida ushbu xabarni tarqatgan shaxs fuqaro D.O. ekanligi aniqlangan.
Ma’lum bo‘lishicha, “Haqiqatchi blogerlar” akkauntini yurituvchi D.O. 1971-yilda Sariosiyo tumanida tug‘ilgan. U Samarqand Tibbiyot institutini tamomlagan bo‘lib, Sariosiyo tumani Tibbiyot birlashmasiga qarashli tez tibbiy yordam bo‘limida shifokor-kardiolog bo‘lib ishlaydi. Shu bilan birga, Sariosiyo tumani Sharg‘un shahrida joylashgan poliklinikada ham davolovchi shifokor sifatida faoliyat yuritadi.
Tekshirishda fuqaro D.O. ushbu xabarni viloyat Sanitariya-epidemiologik osoyishtalik markazi xodimidan olganligini ma’lum qilib, ushbu ayolning ismini aytmagan. Begona ayol o‘z telefon raqamidan 24-iyul kuni soat 08:00 larda qo‘ng‘iroq qilib, avvaliga muammolari haqida aytgan. Keyin esa go‘yo Surxondaryo viloyati hokimi vafot etganligi haqida bildirgan.
Shu paytning o‘zida D.O. o‘zining Redmi Note 9 rusumli uyali telefonida ushbu yolg‘on (rasmiy tasdiqlanmagan) xabar to‘g‘risida post tayyorlab, Facebook hamda Telegram’dagi sahifalariga joylashtirgan.
Tekshiruvda to‘plangan hujjatlar 24-iyulda Ma’muriy javobgarlik to‘g‘risidagi kodeksning 40-moddasi (Tuhmat) va 46-moddasi (Fuqaroga ma’naviy yoki moddiy zarar yetkazishi mumkin bo‘lgan ma’lumotlarni oshkor etish) bilan Uzun tumani ma’muriy sudiga yuborilgan va sudning shu kundagi qarori bilan huquqbuzar D.O.ga nisbatan bazaviy hisoblash miqdorining 10 baravari miqdorida jarima jazosi tayinlangan. Ish bo‘yicha dalil tariqasida olingan Redmi Note 9 rusumli uyali telefoni ma’muriy huquqbuzarlik sodir etish quroli sifatida davlat foydasiga musodara qilindi.
Tekshiruvlar davom ettirilib, D.O.ga qo‘ng‘iroq qilib, yolg‘on ma’lumot taqdim etgan noma’lum ayol Termiz shahar Sanitariya-epidemiologik osoyishtalik markazi xodimi G.R. ekanligi aniqlangan. G.R. o‘z tushuntirishida D.O.ga mazkur yolg‘on xabarni aytganligini tan olgan.
Mazkur holat yuzasidan G.R.ga nisbatan Ma’muriy javobgarlik to‘g‘risidagi kodeksning 40-moddasi (Tuhmat) bilan ma’muriy ish qo‘zg‘atilib, tegishli sud organiga yuborilgan.
Eslatib o‘tamiz, Surxondaryo viloyati hokimi To‘ra Bobolov koronavirusga chalingan bo‘lishi mumkinligi haqidagi ma’lumot “Daryo”ga dastlab 15-iyul kuni tushgandi. Viloyatdagi manbalar Termizda odatda viloyat hokimi tomonidan o‘tkazadigan yig‘ilish va tadbirlar uning o‘rinbosari tomonidan olib borilayotganini ma’lum qilgan. SSV uning kasallikka chalingani haqida 18-iyul kuni xabar bergan.
Oradan bir necha kun o‘tib, To‘ra Bobolovning koronavirusdan vafot etganligi to‘g‘risida ijtimoiy tarmoqlarda xabarlar tarqaldi. Surxondaryo viloyati hokimligi bu xabarni rad etib, “Vohadoshlarimizdan ayrim fuqarolar tomonidan koronavirus vahimasi fonida tarqatilayotgan bunday mish-mishlar, yolg‘on axborotlarga ishonmasliklaringizni so‘raymiz”, deya bayonot bilan chiqdi, biroq ko‘p o‘tmay hokimlik matbuot xizmati bu xabarni o‘chirib tashlab, o‘rniga yangi xabar chiqargan va unda viloyat hokimining ahvoli yaxshi ekanligi, yaqin kunlarda ish faoliyatini davom ettirishi qo‘shimcha qilingan. To‘ra Bobolovning o‘zi 24-iyul kuni videomurojaat qilib, ahvoli yaxshi ekanligini ma’lum qildi.
