Umumta’lim maktablarining 1-sinfiga qabul jarayonlari 20-iyundan boshlanadi. Bu haqda Xalq ta’limi vazirligi matbuot xizmati xabar berdi.
Maktablarga biriktirilgan mikrohudud bo‘yicha qabul jarayonlari 2022-yilning 20-iyunidan 31-iyuliga qadar amalga oshiriladi.
Umumta’lim maktablarining o‘quvchi o‘rni, malakali pedagog kadrlar bilan ta’minlangani, sinf xonalarining o‘quv mebellari bilan jihozlanganidan kelib chiqib, umumta’lim maktablarining bo‘sh o‘rinlariga mikrohududdan tashqari qo‘shimcha qabul jarayonlari 2022-yilning 1—15-avgust kunlari amalga oshiriladi.
Shuningdek, ota-onalarga qulaylik yaratish maqsadida Toshkent shahri, Qoraqalpog‘iston Respublikasi va viloyatlarning markazidagi umumta’lim maktablarida 1-sinfga qabul jarayonlari elektron shaklda amalga oshiriladi.
“Amaldagi qonun hujjatlariga muvofiq, umumta’lim maktablarining 1-sinfiga bolalar 7 yoshga to‘ladigan yilda qabul qilinadi. Ya’ni yangi 2022/2023-o‘quv yilida 2015-yilning 1-yanvaridan 31-dekabriga qadar tug‘ilgan bolalar 1-sinfga qabul qilinadi. Qabul jarayonlari haqida qo‘shimcha ma’lumot olish uchun maktab ma’muriyatiga murojaat qilishingiz mumkin”, — deyiladi xabarda.
Avvalroq “Xalq ta’limi tizimida davlat xizmatlarini ko‘rsatishni yanada takomillashtirish to‘g‘risida”gi hukumat qarori qabul qilingandi. Unga ko‘ra, har yili 1-maygacha o‘quvchilarni 1-sinfga qabul qilish va bir maktab (sinf)dan boshqasiga o‘tkazish bo‘yicha davlat xizmatlari ko‘rsatiladigan hududlar ro‘yxati tasdiqlanish va Xalq ta’limi vazirligi rasmiy veb-saytida e’lon qilish belgilangan.
Izoh (0)