Rossiya mudofaa vaziri Sergey Shoygu Ukrainaning Lugansk viloyatidagi Severodonetsk turar joy mavzelari “to‘la ozod etilgan”ini da’vo qildi. Shoyguning ushbu bayonoti Mudofaa vazirligi yig‘ilishida berildi.
Severodonetsk shahrining turar joy mavzelari to‘la ozod qilindi. Shaharning sanoat zonasi va yaqin atrofdagi aholi punktlarini nazoratga olish harakatlari davom etmoqda.Rossiya mudofaa vazirining so‘zlariga ko‘ra, “shu kungacha Lugansk xalq respublikasi hududining to‘qson yetti foizi ozod qilingan”. “Donetsk va Lugansk xalq respublikalarining Severskiy Donetsk daryosi chap qirg‘og‘ida joylashgan muhim qismlari, jumladan, Krasniy Liman va Svyatogorsk shaharlari hamda yana 15 ta aholi punkti ozod qilindi”, — deya qo‘shimcha qilgan Shoygu.
5-iyunda Lugansk viloyati ma’muriyati rahbari Sergey Gayday Ukraina armiyasi Severodonetsk hududining yarmini nazorat qilayotganini ma’lum qilgandi. Ertasi kuni esa u shahardagi vaziyat yomonlashganini, qarshi hujum paytida rus qo‘shinlari shaharning yarmini bosib olganini, Ukraina Qurolli kuchlari esa sanoat zonasidagi pozitsiyalarini egallab turganini aytgan. 7-iyun kuni ertalab Sergey Gayday “dushman Severodonetskka hujum qilishda davom etar ekan, janglar davom etaveradi” deya bayonot berdi.
6-iyun kuni Ukraina prezidenti Vladimir Zelenskiy Severodonetsk yo‘nalishida “qiyin vaziyat” yuzaga kelganini, biroq ukrainaliklarda “bu yo‘nalishda kurashish uchun barcha imkoniyatlar borligini” aytdi. Ukraina prezidentining ta’kidlashicha, agar Severodonetsk boy berilsa, u holda Ukraina qo‘shinlariga “shaharga qayta kirish uchun besh baravar ko‘proq texnika va odamlar kerak bo‘ladi” .
Izoh (0)