Россия мудофаа вазири Сергей Шойгу Украинанинг Луганск вилоятидаги Северодонецк турар жой мавзелари «тўла озод этилган»ини даъво қилди. Шойгунинг ушбу баёноти Мудофаа вазирлиги йиғилишида берилди.
Северодонецк шаҳрининг турар жой мавзелари тўла озод қилинди. Шаҳарнинг саноат зонаси ва яқин атрофдаги аҳоли пунктларини назоратга олиш ҳаракатлари давом этмоқда.Россия мудофаа вазирининг сўзларига кўра, «шу кунгача Луганск халқ республикаси ҳудудининг тўқсон етти фоизи озод қилинган». «Донецк ва Луганск халқ республикаларининг Северский Донецк дарёси чап қирғоғида жойлашган муҳим қисмлари, жумладан, Красний Лиман ва Святогорск шаҳарлари ҳамда яна 15 та аҳоли пункти озод қилинди», — дея қўшимча қилган Шойгу.
5 июнда Луганск вилояти маъмурияти раҳбари Сергей Гайдай Украина армияси Северодонецк ҳудудининг ярмини назорат қилаётганини маълум қилганди. Эртаси куни эса у шаҳардаги вазият ёмонлашганини, қарши ҳужум пайтида рус қўшинлари шаҳарнинг ярмини босиб олганини, Украина Қуролли кучлари эса саноат зонасидаги позицияларини эгаллаб турганини айтган. 7 июнь куни эрталаб Сергей Гайдай «душман Северодонецкка ҳужум қилишда давом этар экан, жанглар давом этаверади» дея баёнот берди.
6 июнь куни Украина президенти Владимир Зеленский Северодонецк йўналишида «қийин вазият» юзага келганини, бироқ украиналикларда «бу йўналишда курашиш учун барча имкониятлар борлигини» айтди. Украина президентининг таъкидлашича, агар Северодонецк бой берилса, у ҳолда Украина қўшинларига «шаҳарга қайта кириш учун беш баравар кўпроқ техника ва одамлар керак бўлади» .
Изоҳ (0)