Belarus armiyasi tinch davrdan harbiy davrga o‘tishni mashq qilmoqda

Belarus Qurolli kuchlarida barcha bo‘linmalar va barcha toifadagi harbiy xizmatchilar ishtirokida tinch davrdan harbiy davrga o‘tish bo‘yicha mashg‘ulotlar boshlandi, deb yozadi “Kommersant”. Ularda necha kishi qatnashayotgani va qancha davom etishi haqida respublika Mudofaa vazirligi ma’lumot bergani yo‘q.

“Mashg‘ulotlarning umumiy yo‘nalishi barcha toifadagi harbiy xizmatchilar, bo‘linmalar, harbiy qismlar, qo‘shilmalar, harbiy boshqarma  organlari bilan tinch davrdan harbiy davrga o‘tish bo‘yicha tadbirlarni uyushgan holda bajarish bo‘yicha ketma-ket mashg‘ulotlar majmuasini o‘tkazishdan iborat”, — deyiladi idora xabarida.

Harbiy davr — ikkita davlat, davlatlar guruhi yoki bo‘lmasa bitta davlat ichidagi siyosiy kuchlar o‘zaro urush holatida bo‘lib turadigan davr.

4-may kuni Belarus armiyasida javob kuchlarini kutilmaganda tekshirish boshlandi, uning doirasida shaxsiy tarkibning ehtimoliy inqirozli vaziyatlar yuzaga kelishiga tezkorlik bilan javob qaytarishga shayligi va imkoniyati baholanishi aytildi.

Shuningdek, ushbu tadbirlar o‘quv mashg‘ulotlari bo‘lib, boshqa mamlakatlar uchun xavf tug‘dirmasligi ta’kidlandi. “G‘arb tinch uxlashi mumkin”, — degandi Lukashenko.

Tekshiruv bir nechta bosqichlarda amalga oshirilmoqda. Ikkinchisi 10-may kuni, keyingisi 23-may kuni boshlandi. Qurolli kuchlar, xususan, qurol-yarog‘ni, harbiy qismlarda uzoq vaqt saqlanadigan jangovar va maxsus texnikani tekshirmoqda.

Shuningdek, 10-may kuni Belarus Ukraina bilan chegaraga “maxsus operatsiya kuhclari” joylashtirilganini e’lon qildi. May oxirida esa Aleksandr Lukashenko mamlakatda xalq lashkari tuzish vazifasini qo‘ydi. Hamda u Belarus qurolli kuchlarida Ukraina yo‘nalishida (janubiy yo‘nalishda) tezkor qo‘mondonlik tuzilishini ma’lum qildi.