Yevropa Ittifoqi Turkiyani Ukrainadagi vaziyat bo‘yicha Bryussel siyosatiga mos keladigan qat’iyroq pozitsiyada bo‘lishga chaqirmoqda. Bu haqda Yevropa komissiyasining kengayish va qo‘shnichilik siyosati masalalari bo‘yicha a’zosi Oliver Varxeliga tayanib, “Interfaks” xabar berdi.
“Biz Turkiyaning Ukrainadagi mojaroning keskinlashuvini yumshatishdagi konstruktiv rolini olqishlaymiz. Shu bilan birga, Turkiyani Yevropa Ittifoqiga yanada mos keladigan kuchliroq pozitsiyani egallashga hamda Rossiyaga qarshi kiritilgan sanksiyalarni chetlab o‘tishga yo‘l qo‘ymaslik masalasida hushyorroq bo‘lishga chaqirishda davom etamiz”, — dedi Varxeli Yevropa Parlamentida.
Uning qo‘shimcha qilishicha, Turkiyaning “faol diplomatiyada davom etishi hamda Ukraina bilan birdamligi” va u yerda o‘t ochilishni to‘xtatishga qaratilgan sa’y-harakatlari katta ahamiyatga ega.
O‘tgan hafta Turkiya tashqi ishlar vaziri Mevlut Chavusho‘g‘li mamlakat G‘arbning Rossiyaga qarshi sanksiyalarini qo‘llab-quvvatlamasligini, biroq Rossiya Anqaraning yordami bilan cheklovlarni chetlab o‘tishiga yo‘l qo‘ymasligini aytgan edi.
May oyi oxirida Erdo‘g‘on Rossiya prezidenti Vladimir Putin bilan telefon orqali muloqot qildi va Anqaraning Rossiya, Ukraina va BMT o‘rtasida Ukraina hududida monitoring mexanizmini shakllantirish bo‘yicha uchrashuvni qabul qilishga tayyorligini aytdi. U tomonlar mazkur tashabbusni qo‘llab-quvvatlashiga umid bildirdi.
Izoh (0)