Qozog‘istonda o‘tkazilgan referendum natijalari e’lon qilindi

Referendum o‘tkazish bo‘yicha Qozog‘iston Markaziy komissiyasi respublikada o‘tkazilgan referendumining yakuniy natijalarini e’lon qildi, deya xabar bermoqda Tengrinews.

Markaziy Saylov Komissiyasi ma‘lumotlariga ko‘ra, saylov huquqiga ega bo‘lgan 11 million 734 ming 642 nafar fuqarodan 7 million 985 ming 769 nafari ovoz berish jarayonida qatnashgan. Bu umumiy saylovchilarning 68,05 % tashkil qiladi.

Referendumda ishtirok etgan fuqarolarning 77,18 % (6 163 516 nafar kishi) byulletendagi “Qozog‘iston Respublikasi Konstitutsiyasiga o‘zgartish va qo‘shimchalar kiritish to‘g‘risida”gi qonun loyihasida nazarda tutilgan o‘zgartirish va qo‘shimchalarni Qozog‘iston Respublikasi Konstitutsiyasiga kiritishni ma’qullaysizmi” degan yagona savolga “Ha” deya javob bergan bo‘lsa, 18,66 % (1 490 470 nafar) fuqaro o‘zgartirishlarga qarshi ovoz bergan. 2,58 %  byulleten esa haqiqiy emas deb topilgan. Shuningdek, ovozlarni hisoblash jarayonida 1,58 foiz byulleten hisobga olinmagan.

“Shu tariqa, referendum o‘tgan deb hisoblanadi. Referendumga qo‘yilgan Konstitutsiyaga kiritilgan o‘zgartish va qo‘shimchalar, agar fuqarolarning yarmidan ko‘prog‘i, viloyatlar, respublika ahamiyatiga molik shaharlar va poytaxtning kamida uchdan ikki qismi tomonidan ma’qullab ovoz berilgan bo‘lsa, qabul qilingan hisoblanadi.

Referendumda qabul qilingan qaror majburiydir va boshqa hujjatlar bilan qo’shimcha tasdiqlashni talab qilmaydi. Konstitutsiyaga kiritilishi ko‘zda tutilgan, referendumda qabul qilingan o‘zgartish va qo‘shimchalar referendum yakunlari to‘g‘risidagi rasmiy hisobot e’lon qilingan kundan e’tiboran kuchga kiradi” — Nurlan Abdirov, referendum o‘tkazish bo‘yicha Markaziy komissiya rahbari.

Eslatib o‘tamiz, 5 iyun kuni Qozog‘istonda Konstitutsiyaga o‘zgartirish va qo‘shimchalar kiritish bo‘yicha respublika referendumi bo‘lib o‘tdi. Byulletenda faqat bitta savol bor edi: “Qozog‘iston Respublikasi Konstitutsiyasiga o‘zgartish va qo‘shimchalar kiritish to‘g‘risida”gi qonun loyihasida nazarda tutilgan o‘zgartirish va qo‘shimchalarni Qozog‘iston Respublikasi Konstitutsiyasiga kiritishni ma’qullaysizmi?”.

Referendum o‘tgan hisoblanishi uchun unda ishtirokchilar ro‘yxatiga kiritilgan fuqarolarning yarmidan ko‘pi ishtirok etishi lozim bo‘lib, 6-iyun, soat 14:00 holatiga ko‘ra, saylovda ishtirok etish chegarasiga erishilgan.