O‘zbekiston musulmonlari idorasi raisi, muftiy Nuriddin domla Xoliqnazarovga 4-iyun kuni O‘zbekiston xalqaro islom akademiyasi Ilmiy kengashi tomonidan faxriy doktor ilmiy darajasi berildi. Bu haqda O‘zbekiston musulmonlari idorasi xabar qildi.
Bunda muftiyning islom dini ma’rifatini keng yoyish, yoshlarni ruhiy barkamol etib tarbiyalash va ilmiy-ijodiy faoliyatlari hisobga olingani aytilgan.
Ilmiy kengash yig‘ilishini O‘zbekiston prezidentining jamoat va diniy tashkilotlar bilan hamkorlik masalalari bo‘yicha maslahatchisi, xalqaro islom akademiyasi rektori Muzaffar Komilov ochib bergan.
Ma’lumot uchun, Muftiy Nuriddin domla hazratlari 1968-yil Andijon viloyati Asaka shahrida ziyoli oilada tavallud topgan. Ma’lumoti oliy, Mir Arab o‘rta maxsus islom bilim yurti, Toshkent islom instituti va Farg‘ona davlat universitetini tamomlagan. Islomshunos, imom-xatib va tarixshunos mutaxassisliklariga ega.
Mehnat faoliyatlarini 1996-yilda Andijon viloyati Asaka shahri “Ahmadali Maxdum” masjidi imom-xatibi vazifasidan boshlagan. 2004-yil Toshkent shahridagi “Oq tepa” masjidi imom-xatibi vazifasida davom ettirib, bir vaqtda poytaxtdagi “Ko‘kaldosh” o‘rta-maxsus islom bilim yurti o‘qituvchisi sifatida ham faoliyat yuritgan. 2005-yilda O‘zbekiston musulmonlar idorasining Andijon viloyati vakili, viloyat bosh imom-xatibi, 2019-yilda Toshkent shahar bosh imom-xatibi lavozimlariga tayinlandi.
Nuriddin domla 2021-yil 19-oktabr kuni O‘zbekiston musulmonlari idorasi raisi, muftiy lavozimiga saylandi.
Izoh (0)