Farg‘ona viloyati Marg‘ilon shahrida tomorqasida ko‘knori o‘simligini parvarishlayotgan shaxs aniqlandi. Bu haqda viloyat Ichki ishlar boshqarmasi xabar qildi.
Ma’lum qilinishicha, 21-may kuni Marg‘ilon shahar IIB JQB xodimlari tomonidan o‘tkazilgan tadbir davomida “Yovqochar” mahalla hududida yashovchi fuqaro Y.E.ning yashash xonadoni xolislar ishtirokida ko‘zdan kechirilganda, tomorqasida 170 tup ko‘knori parvarishlab kelayotgani aniqlanib, daliliy ashyo tariqasida olingan.
Holat yuzasidan Marg‘ilon shahar IIB huzuridagi tergov bo‘limi tomonidan Jinoyat kodeksining 270-moddasi (taqiqlangan ekinlarni yetishtirish) 1-qismi bilan jinoyat ishi qo‘zg‘atilib, tergov harakatlari olib borilmoqda.
Avvalroq Jizzaxda Tojikistondan olib o‘tilgan 2,8 kilo opiyni sotishga uringan shaxs 12 yilga qamalgani, Samarqandda omborxona yerida 2 ming tup marixuana yetishtirgan shaxslar tekshiruv paytida ularga o‘t qo‘ygani, Farg‘onada tomorqasida 60 tup kannabis parvarishlab kelayotgan fuqaro aniqlangani xabar qilingan.
Izoh (0)