Surxondaryo viloyatining Jarqo‘rg‘on tumanida noqonuniy yer oldi-sotdisi bilan bog‘liq holatga chek qo‘yildi, deb xabar beradi viloyat IIB axborot xizmati.
Ma’lum qilinishicha, 18-may kuni Qumqo‘rg‘on tumanida yashovchi B.S. viloyat IIBga yozgan arizasiga asosan Jinoyat-qidiruv boshqarmasi Korrupsiya va iqtisodiy jinoyatlarga qarshi kurashish bo‘limi xodimlari tomonidan tezkor tadbir o‘tkazilgan.
Termiz shahar “Alpomish” mahallasida joylashgan restoranlarning birida o‘tkazilgan tezkor tadbir davomida Jarqo‘rg‘on tumanida yashovchi X.I. tuman hududida joylashgan o‘ziga tegishli bo‘lmagan 50 sotix yer maydonini jami 500 million so‘mga sotmoqchi ekani aniqlangan. U fuqaro B.S.dan 214 million so‘m pullarni olgan vaqtida ashyoviy dalillar bilan qo‘lga olingan.
Fuqaro X.I.ga nisbatan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilgan.
Avvalroq Samarqandda hokimiyat zaxirasidagi yerni 65 ming dollarga sotishga uringan shaxslar ushlangani, Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Davlat kadastrlari palatasi Nurobod tuman filiali mutaxassislari 2 mln so‘m pora bilan ushlangani to‘g‘risida xabar berilgandi.
Izoh (0)