O‘zbekiston Respublikasi Prezidentining 2022-yil 24-yanvardagi “Respublikada ishlab chiqarishni rivojlantirish va sanoat kooperatsiyasini kengaytirishning samarali tizimini yaratish chora-tadbirlari to‘g‘risida”gi PQ 99-sonli qarori asosida respublikaning 50 ga yaqin mahalliy ishlab chiqaruvchilarining Buxoro neftni qayta ishlash zavodiga tashrifi amalga oshirildi.
Mazkur tashrif davomida zavod ehtiyojlari uchun zarur bo‘ladigan mahsulotlar, butlovchi buyum, materiallar hamda sanoat xizmatlarini mahalliylashtirish, korxonalar o‘rtasida sanoat kooperatsiyasi aloqalarini o‘rnatish masalasi ko‘rib chiqildi va hamkorlik borasida aniq chora-tadbirlar belgilab olindi.
Tashrif davomida tadbirkorlarga zavodning barcha ishlab chiqarish uskunalari va reaktorlari, ularning ishlash faoliyati va mohiyati, zamonaviy laboratoriya, boshqaruv pulti bo‘yicha atroflicha ma’lumot berildi. Alohida tashkil etilgan shourumda ekspluatatsiya jarayonida zavod ehtiyojlari uchun zarur bo‘ladigan va hozirda importdan yetkazib berilayotgan mahsulotlar namunalari ko‘rsatib berildi.
Tadbir doirasida zavodga tashrif buyurgan mahalliy ishlab chiqaruvchi tadbirkorlar respublikaning deyarli barcha hududlaridan tashrif buyurishgan bo‘lib, ular bilan zavod uchun mahsulotlar ishlab chiqarishni tashkil etish va yangi turlarini o‘zlashtirish bo‘yicha 20 ga yaqin o‘zaro anglashuv memorandumi imzolandi.
Aytish joizki, “O‘zbekneftgaz” AJ boshqaruvi raisi Mehriddin Abdullayevning tashabbus va topshiriqlari asosida jamiyat va mahalliy ishlab chiqarish korxonalari o‘rtasida sanoat kooperatsiyasi aloqalarini amalga oshirish ishlariga doimiy ravishda ustuvor ahamiyat berib kelinmoqda.
2022-yilda yagona kooperatsiya portali orqali mahalliy ishlab chiqaruvchilardan 1,5 trillion so‘mdan ortiq shartnomalar tuzilishi, mahalliy korxonalar bilan kooperatsiya asosida 350 dan ortiq mahsulot va xizmatlarni o‘zlashtirish bo‘yicha “yo‘l xaritalari” imzolanishi, shuningdek, 10 million AQSH dollaridan ortiq miqdordagi mahsulotlarni o‘zlashtirish va ular importini qisqartirishga erishish reja qilingan.
Aynan mahalliy ishlab chiqaruvchilarni qo‘llab-quvvatlash, ular bilan hamkorlikni kengaytirish doirasida Buxoro neftni qayta ishlash zavodi tomonidan 2021-yil davomida yagona elektron kooperatsiya portali orqali jami 137 ta mahalliy korxonalar bilan umumiy qiymati 32,0 milliard so‘mga teng bo‘lgan 490 ta shartnomalar imzolangan.
Bundan tashqari mahalliy tadbirkorlik subyektlari va ilmiy tadqiqot institutlari tomonidan ishlab chiqarilayotgan mahsulotlarni zavodda tajriba sinovlaridan o‘tkazish orqali sifat va narx ko‘rsatgichlari bilan bog‘liq masalalar borasida hamkorlikda ishlar rejalashtirilgan.
“O‘zbekneftgaz” AJ matbuot xizmati
Izoh (0)