Ўзбекистон мусулмонлари идораси раиси, муфтий Нуриддин домла Холиқназаровга 4 июнь куни Ўзбекистон халқаро ислом академияси Илмий кенгаши томонидан фахрий доктор илмий даражаси берилди. Бу ҳақда Ўзбекистон мусулмонлари идораси хабар қилди.
Бунда муфтийнинг ислом дини маърифатини кенг ёйиш, ёшларни руҳий баркамол этиб тарбиялаш ва илмий-ижодий фаолиятлари ҳисобга олингани айтилган.
Илмий кенгаш йиғилишини Ўзбекистон президентининг жамоат ва диний ташкилотлар билан ҳамкорлик масалалари бўйича маслаҳатчиси, халқаро ислом академияси ректори Музаффар Комилов очиб берган.
Маълумот учун, Муфтий Нуриддин домла ҳазратлари 1968 йил Андижон вилояти Асака шаҳрида зиёли оилада таваллуд топган. Маълумоти олий, Мир Араб ўрта махсус ислом билим юрти, Тошкент ислом институти ва Фарғона давлат университетини тамомлаган. Исломшунос, имом-хатиб ва тарихшунос мутахассисликларига эга.
Меҳнат фаолиятларини 1996 йилда Андижон вилояти Асака шаҳри «Аҳмадали Махдум» масжиди имом-хатиби вазифасидан бошлаган. 2004 йил Тошкент шаҳридаги «Оқ тепа» масжиди имом-хатиби вазифасида давом эттириб, бир вақтда пойтахтдаги «Кўкалдош» ўрта-махсус ислом билим юрти ўқитувчиси сифатида ҳам фаолият юритган. 2005 йилда Ўзбекистон мусулмонлар идорасининг Андижон вилояти вакили, вилоят бош имом-хатиби, 2019 йилда Тошкент шаҳар бош имом-хатиби лавозимларига тайинланди.
Нуриддин домла 2021 йил 19 октябрь куни Ўзбекистон мусулмонлари идораси раиси, муфтий лавозимига сайланди.
Изоҳ (0)