Toshkentda boshqaruvni yo‘qotgan Lacetti “stolba”ga urildi. 21 yoshli haydovchi vafot etdi

Toshkent shahrida sodir bo‘lgan yo‘l-transport hodisasi oqibatida haydovchi halok bo‘ldi, deb xabar beradi poytaxt IIBB axborot xizmati.

Ma’lum qilinishicha, 4-iyun kuni soat 00:25 larda Mirzo Ulug‘bek tumani, Oqqo‘rg‘on ko‘chasida Lacetti rusumli avtomashinani boshqarib ketayotgan 21 yoshli S.N. boshqaruvni yo‘qotib, yo‘lni o‘rtasidagi yoritish ustuniga urilgan.

YTH oqibatida Lacetti rusumli avtomashina haydovchisi tan jarohati olib, shifoxonaga yotqizilgan, biroq tibbiyot xodimlarining urinishlariga qaramay, u jonlantirish bo‘limida vafot etgan.

Mazkur holat yuzasidan Toshkent shahar IIBB tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Jizzaxda katta tezlikda harakatlangan Lacetti avtomobili Nexia-3 va Damas bilan to‘qnashgani, Toshkentda “Gazel” “peshexod”dan o‘tayotgan piyodani urib yuborgani, Toshkentda tezlikni oshirgan Cobalt yo‘l chetidagi beton ustunga borib urilgani to‘g‘risida xabar berilgandi.