1-iyun kuni Rossiya Tashqi ishlar vaziri Sergey Lavrov Saudiya Arabistonida Fors ko‘rfazidagi arab mamlakatlari tashqi ishlar vazirlari bilan uchrashdi. Reuters xabariga ko‘ra, uchrashuvda Fors ko‘rfazi rasmiylari Rossiya va Belarusga qarshi sanksiyalarda qatnashmasligini ma’lum qilgan.
Saudiya Arabistoni tashqi ishlar vaziri shahzoda Faysal bin Farxon al-Saud muzokaralar chog‘ida Fors ko‘rfazidagi arab mamlakatlari Rossiya—Ukraina mojarosida umumiy pozitsiyaga egaligini va ziddiyatning jahon oziq-ovqat xavfsizligiga ta’siridan juda xavotirda ekanini aytib o‘tgan.
Mart oyi boshida arab davlatlari Ukrainadagi vaziyat bo‘yicha betarafligini e’lon qilgan edi. “Arab davlatlari Ukraina bilan ham, Rossiya bilan ham do‘stona munosabatda. Do‘stlarga esa ularning bir-biri bilan urushayotganini kuzatish og‘ir va shu sabab Arab davlatlari ligasi kengashi betaraflik pozitsiyasini egalladi”, — degan kengash bosh kotibining yordamchisi.
Arab davlatlari ligasiga 18 ta davlat, jumladan, Saudiya Arabistoni, BAA, Qatar va Kuvayt kiradi.
Rossiya fevral oxirida Ukrainaga bostirib kirishni boshlaganidan keyin Yevropa davlatlari, AQSH, Kanada va Avstraliya Rossiyaga qarshi qator sanksiyalarni e’lon qildi. Osiyoda birinchi bo‘lib Yaponiya Rossiyaga qarshi sanksiyalarni kiritdi. Shundan so‘ng Janubiy Koreya va Singapur ham Rossiyaga nisbatan eksport nazoratini kuchaytirib, Moskvaga qarshi xalqaro sanksiyalarga qo‘shildi.
Izoh (0)