1 июнь куни Россия Ташқи ишлар вазири Сергей Лавров Саудия Арабистонида Форс кўрфазидаги араб мамлакатлари ташқи ишлар вазирлари билан учрашди. Reuters хабарига кўра, учрашувда Форс кўрфази расмийлари Россия ва Беларусга қарши санкцияларда қатнашмаслигини маълум қилган.
Саудия Арабистони ташқи ишлар вазири шаҳзода Файсал бин Фархон ал-Сауд музокаралар чоғида Форс кўрфазидаги араб мамлакатлари Россия—Украина можаросида умумий позицияга эгалигини ва зиддиятнинг жаҳон озиқ-овқат хавфсизлигига таъсиридан жуда хавотирда эканини айтиб ўтган.
Март ойи бошида араб давлатлари Украинадаги вазият бўйича бетарафлигини эълон қилган эди. «Араб давлатлари Украина билан ҳам, Россия билан ҳам дўстона муносабатда. Дўстларга эса уларнинг бир-бири билан урушаётганини кузатиш оғир ва шу сабаб Араб давлатлари лигаси кенгаши бетарафлик позициясини эгаллади», — деган кенгаш бош котибининг ёрдамчиси.
Араб давлатлари лигасига 18 та давлат, жумладан, Саудия Арабистони, БАА, Қатар ва Кувайт киради.
Россия февраль охирида Украинага бостириб киришни бошлаганидан кейин Европа давлатлари, АҚШ, Канада ва Австралия Россияга қарши қатор санкцияларни эълон қилди. Осиёда биринчи бўлиб Япония Россияга қарши санкцияларни киритди. Шундан сўнг Жанубий Корея ва Сингапур ҳам Россияга нисбатан экспорт назоратини кучайтириб, Москвага қарши халқаро санкцияларга қўшилди.
Изоҳ (0)