Bugun,

  • USD 11095.31
  • RUB 173.84
  • EUR 10772.44

Yaponiya hukumati Rossiya, shuningdek, Donbass respublikalariga qarshi qator cheklov choralarini joriy etish bo‘yicha qaror qabul qildi. Bu haqda mamlakat bosh vaziri Fumio Kisidaga tayanib, “Interfaks” xabar berdi.

Foto: Deutsche Welle

Foto: Deutsche Welle

U Moskvani “Ukraina atrofidagi vaziyatni tartibga solishda diplomatik qadamlarga qaytishga” chaqirib, DXR va LXR mustaqilligining tan olinishi “Ukraina suvereniteti va hududiy yaxlitligini buzish” ekanini ta’kidlagan.

Shu munosabat bilan bosh vazir “Yaponiya sanksiyalar qo‘llash bo‘yicha qaror qabul qilganini” aytgan. Unga ko‘ra, Donbass respublikalari vakillariga viza berish to‘xtatiladi va ularning kapitallari muzlatiladi, mazkur respublikalar bilan eksport-import munosabatlari, shuningdek, Rossiya hukumatining yangi suveren qarzi bo‘yicha operatsiyalar taqiqlanadi.

“Keyinchalik ushbu chora-tadbirlarning tafsilotlarini hal qilamiz va zaruriy tartib-qoidalarni kechiktirmasdan amalga oshiramiz”, — degan bosh vazir. Uning qayd etishicha, vaziyat yomonlashgan taqdirda, chora-tadbirlar ro‘yxati kengaytirilishi mumkin.

Bundan tashqari, Kanada va Avstraliya hukumatlari ham Rossiyaga qarshi sanksiyalarni joriy etgan. Kanada bosh vaziri Jastin Tryudo iqtisodiy sanksiyalarning “birinchi raundi” haqida e’lon qilgan. Cheklovlar DXR va LXR mustaqilligini tan olishni qo‘llab-quvvatlagan deputatlarga taalluqli. Shuningdek, kanadaliklarga ushbu respublikalar bilan moliyaviy operatsiyalarni o‘tkazish taqiqlanadi.

“Tan olish (DXR va LXR mustaqilligini — tahr.) Rossiyaning BMT nizomi bo‘yicha majburiyatlarini buzish hisoblanadi”, — deydi Tryudo.

Rossiyaning Ottavadagi elchisi Oleg Stepanovning so‘zlariga ko‘ra, Kanada hukumatining qarori “Rossiyaning Donbassda tinchlikni ta’minlashga qaratilgan siyosati va amaliy yo‘nalishi”ga ta’sir ko‘rsatmaydi.

Avstraliya bosh vaziri Skott Morrisonning ma’lum qilishicha, mamlakat bir qator rossiyalik jismoniy shaxslarga qarshi sanksiyalar qo‘llanadi. “Dastavval biz Rossiya Xavfsizlik kengashining sakkiz a’zosini mamlakatga kirishini taqiqlash va maqsadli moliyaviy sanksiyalarni joriy etamiz”, — deya aniqlik kiritgan Morrison.

Shu bilan birga, hukumat “Qrim va Sevastopolga qarshi” amaldagi sanksiyalarni kengaytiradi: endilikda ular “Donetsk va Lugansk hududlariga” ham taalluqli.

Avvalroq YeI mamlakatlari Rossiyaga qarshi sanksiyalarni kelishib olgani, qora ro‘yxatga Davlat dumasining LXR va DXR mustaqilligini yoqlab ovoz bergan 351 nafar deputati kiritilgani, Bayden DXR va LXR mustaqilligini tan olgan Rossiyaga qarshi sanksiyalar e’lon qilgani to‘g‘risida xabar berilgandi.

Izoh
Asosiy yangiliklar
Mahalliy
Samarqandda 2 kishi ovqatdan zaharlanib vafot etdi
Mahalliy
Toshkentda avtobusning yurgan masofasiga qarab to‘lov qilish tizimi yo‘lga qo‘yiladi
Mahalliy
Aholining valyuta ayirboshlashga yoʻnaltirgan pul mablagʻlari hajmi 68 foizga oʻsdi — Markaziy bank