Qirg‘iziston Vazirlar Mahkamasi shakar eksportiga vaqtinchalik taqiq joriy qildi, deb yozadi “Interfaks” idora matbuot xizmatiga tayanib.
“Qirg‘iziston Vazirlar Mahkamasi mamlakat hududidan shakar va shakarqamish xomashyosi olib chiqilishiga olti oy muddatga vaqtinchalik taqiq kiritmoqda”, — deyiladi xabarda.
Matbuot xizmati ma’lumotlariga ko‘ra, qaror Qirg‘iziston hududidan shakarning yalpi olib chiqib ketilishi imkoniyatini istisno qilish, mamlakatning oziq-ovqat xavfsizligini ta’minlash va bozorda narxlarni ushlab turish maqsadlarida ishlab chiqilgan.
Avvalroq shakar narxi asossiz o‘sishiga yo‘l qo‘ymaslik uchun Qirg‘iziston monopoliyaga qarshi kurashish xizmati respublikaning barcha viloyatlarida monitoring o‘tkazgandi. Tahlil mamlakatda shakar tanqisligi yo‘qligini, biroq uning narxlari oshishni boshlaganini ko‘rsatdi.
Mamlakat Milliy statistika qo‘mitasi ma’lumotlariga ko‘ra, may boshidan buyon Qirg‘izistonda shakar 10 foizga qimmatlashgan. 2-may holatiga shakarning o‘rtacha narxi 86,38 som (1,04 dollar)ni tashkil etgan bo‘lsa, 30-may kuni u 95,38 som (1,14 dollar)ga yetgan.
Qozog‘istonda esa shakar narxi bir yil ichida 60,5 foizga oshgani ma’lum qilindi. Ta’kidlash joiz, qozog‘istonliklar do‘konlar peshtaxtalarida shakar yo‘qligidan ommaviy shikoyat qilmoqda. Tanqislik so‘nggi bir haftadan buyon, ayniqsa, kuchli sezilmoqda. Shakarning narxi ham juda oshib ketgani aytilmoqda.
Izoh (0)