Plug and Play platformasi joriy yil yakuniga qadar Toshkentda o‘z ofisini ochishi haqida xabar qildi, deb yozadi IT Park Uzbekistan.
Axborot texnologiyalari va kommunikatsiyalarini rivojlantirish vazirligi, IT Park Uzbekistan hamda “AloqaVentures” bilan kechgan uchrashuvlardan so‘ng Plug and Play poytaxtda o‘z vakolatxonasini ishga tushirishi haqida rasman e’lon qildi.
Dastur doirasidagi hamkorlikning dastlabki bosqichi moliyaviy texnologiyalar, sug‘urta va korporativ texnologiyalar, hamda ta’lim yo‘nalishlarini qamrab oladi.
Mintaqadagi eng yosh va jadal rivojlanayotgan ekotizimlardan biri sifatida Plug and Play O‘zbekistonning mahalliy korporativ ekotizimiga axborot texnologiyalari va innovatsiya sohasida eng yuqori xalqaro standartlarga erishishda yordam berishni maqsad qilgan, — deydi kompaniya asoschisi va bosh ijrochi direktori Said Amidi.
Shu bilan birga, dastur dunyoning yetakchi strategik bozorlarida o‘ziga xos maydon taqdim etish orqali mahalliy iste’dodlar va tadbirkorlarni qo‘llab-quvvatlaydi.
Ofis mahalliy korporatsiyalar va agentliklar uchun startaplar bilan yaqindan hamkorlik qilish uchun ko‘proq imkoniyatlar yaratishga, qolaversa, mintaqadagi startap ekotizimini jadallashtirishga xizmat qiladi.
Hamkorlik, shuningdek, startaplarga xalqaro bozorga chiqishga yordam beradi, negaki ular butun dunyo bo‘ylab 40 dan ortiq vakolatxonalardan iborat global tarmoqqa qo‘shilish imkoniyatiga ega bo‘ladilar.
Plug and Play texnik markazining tashkil etilishi O‘zbekiston startap ekotizimlari uchun ulkan voqeadir. Bizning mahalliy startaplarimiz markaz vakolatxonalari joylashgan 35 mamlakatda o‘z loyihalarini namoyish etish imkoniyatiga ega bo‘ladi, — deydi IT Park Uzbekistan direktori Farhod Ibragimov.
Unga ko‘ra, bu O‘zbekistonlik startap tadbirkorlarga xalqaro bozorda sifat va raqobatbardoshlikni oshirishga ko‘mak beribgina qolmay, mamlakatdan ilk “yakkashox” yaratish yo‘lida jipslashtiradi va ekotizim hamkorlarning o‘z faoliyatlarini kengaytirishlari uchun yangi imkoniyatlar eshigini ochadi.
Izoh (0)