O‘zbekistonlik muvaffaqiyatli startap loyiha mualliflari tajriba o‘rganish va hamkorlikni yo‘lga qo‘yish maqsadida Kremniy vodiysiga yuboriladi.
Bu haqda innovatsion rivojlanish vaziri o‘rinbosari Shahlo Turdiqulova va AQSHning StrategEast kompaniyasi prezidenti Anatoliy Motkinning uchrashuvida ma’lum bo‘ldi.
Uchrashuvda hamkorlikda startap akseleratorlarini tashkil etish, axborot texnologiyalari (AT) sohasini rivojlantirish va birgalikda loyihalarni yo‘lga qo‘yish muhokama qilindi.
Anatoliy Motkin O‘zbekistonda muvaffaqiyatli startap loyiha mualliflarini Kremniy vodiysidagi AQSH startaplari tajribasini o‘rganish va hamkorlikni yo‘lga qo‘yish maqsadida Kaliforniyaga yuborishni qo‘llab-quvvatlashini ma’lum qildi.
Shu bilan bir qatorda, tomonlar AQSHning Stenford universiteti bilan hamkorlikda amalga oshirilayotgan “Ishbilarmon ayollar” dasturini O‘zbekistonga tatbiq etish, shuningdek, Belarusda yo‘lga qo‘yilgan loyiha tajribasi asosida texnologik startaplar inkubatorini tashkil etish bo‘yicha hamkorlik qilishga kelishib oldilar.
Ushbu ishlarning amalga oshirilishi natijasida yangi, sifatli va yuqori texnologiyalarga asoslangan ish o‘rinlarining yaratilishi, yangi startap loyihalarining paydo bo‘lishi hamda moliyaviy sarmoyalar jalb qilinishi kutilmoqda.
“StrategEast” AQSHning Vashington shahrida joylashgan tashkilot bo‘lib, asosiy faoliyati xalqaro moliyaviy institutlar, agentliklar va AT sohasidagi yirik ishbilarmon doira vakillari bilan hamkorlikda Yevrosiyo davlatlarida raqamli iqtisodiyotni rivojlantirishga qaratilgandir.
Izoh (0)