“Chorvoq” turistik zonasiga sarmoya kiritgan tadbirkorlarga bir qator imtiyozlar taqdim etiladi. Bu haqda Turizm va madaniy meros vazirligi xabar berdi.
Kiritilgan investitsiyalar hajmiga qarab, mol-mulk solig‘idan, yer solig‘idan va suv resurslaridan foydalanganlik uchun soliqdan quyidagi muddatlarga ozod qilish tarzida soliq imtiyozlari beriladi:
- 300 mln AQSH dollaridan 3 mln AQSH dollarigacha hajmdagi investitsiyalar – 3 yil muddatga;
- 3 mln AQSH dollaridan 5 million AQSH dollarigacha hajmdagi investitsiyalar – 5 yil muddatga;
- 5 mln AQSH dollaridan 10 million AQSH dollarigacha hajmdagi investitsiyalar – 7 yil muddatga.
- 10 mln AQSH dollari va undan ortiq investitsiya kiritilganda — 10 yil muddatga, keyingi 5 yil mobaynida foyda solig‘i va yagona soliq to‘lovi stavkalari amaldagi stavkalardan 50 foiz past miqdorda qo‘llanilgan holda beriladi.
“Chorvoq” turistik rekreatsion zonasi ishtirokchilari quyidagi to‘lovlardan ozod etiladi:
- Respublikada ishlab chiqarilmaydigan va investitsiya bitimiga muvofiq loyihani amalga oshirishda qurilish materiallari uchun bojxona to‘lovlari (bundan qo‘shimcha qiymat solig‘i va bojxona rasmiylashtiruvi uchun yig‘imlar mustasno);
- O‘zbekistonda ishlab chiqarilmaydigan texnologik uskunalarni olib kirishda bojxona to‘lovlari (bundan bojxona rasmiylashtiruvi uchun yig‘imlar mustasno);
- Tovarlarni import qilganda qo‘shilgan qiymat solig‘ini 120 kungacha muddatga kechiktirib to‘lashi mumkin.
Qo‘shilgan qiymat solig‘i summasining oshib ketishi natijasida hosil bo‘lgan summaning o‘rni maxsus iqtisodiy zona ishtirokchisiga yetti kun davomida soddalashtirilgan tartibda qoplab beriladi.
To‘langan qo‘shilgan qiymat solig‘i summasi maxsus iqtisodiy zona ishtirokchilariga respublika budjetidan Vazirlar Mahkamasi tomonidan belgilanadigan tartibda qoplab beriladi.
Yangi dor yo‘llarini qurish va jihozlash uchun davlat tomonidan subsidiya ajratib beriladi:
- Davlat subsidiyasi yo‘lovchi tashuvchi yangi dor yo‘llarini 2023-yil 31-dekabrga qadar foydalanishga topshirish va uzunligi bir tomonga 500 metrdan kam bo‘lmaslik sharti bilan dastlabki 50 ta loyihaga ajratiladi;
- Subsidiya bir marta ajratiladi hamda uning miqdori har 500 metr yo‘l uchun 1 milliard so‘mni tashkil qiladi.
Yangi mehmonxonani qurish va jihozlash uchun investorlar xarajatlarining bir qismi budjeti mablag‘lari hisobidan qoplab beriladi.
3 yulduzli toifa uchun 50 ta xonadan kam bo‘lmagan va 4 yulduzli toifa uchun 100 ta xonadan kam bo‘lmagan fondga ega mehmonxona 2023-yil 31-dekabrgacha foydalanishga topshirilsa yangi mehmonxonani qurish va jihozlash uchun investorlar xarajatlarining bir qismi, bunda:
- 3 yulduzli toifaga ega mehmonxonalardagi har bir xona uchun 40 mln so‘m;
- 4 yulduzli toifaga ega mehmonxonalardagi har bir xona uchun 65 mln so‘mni tashkil qiladi.
Shuningdek, dunyoning taniqli va nufuzli mehmonxona brendlaridan foydalanish bo‘yicha O‘zbekiston rezidentlari bo‘lgan tashkilotlar uchun royalti franchayzing to‘g‘risidagi shartnoma kuchga kirgan vaqtdan boshlab uch yil mobaynida Davlat budjeti mablag‘lari hisobidan quyidagi hajmda qisman moliyalashtiriladi:
- mehmonxonaning bitta xonasi uchun yillik 200 AQSH dollari ekvivalentida;
- dastlabki 30 ta 4 yulduzli toifaga ega mehmonxona — har bir mehmonxonaning bitta xonasi uchun yillik 400 AQSH dollari ekvivalentida.
Bundan tashkilotlar uchun royaltini moliyalashtirishning umumiy hajmi ko‘pi bilan 10 mln AQSH dollari ekvivalentiga teng bo‘ladi.
O‘zbekiston hududiga 2024-yil 1-yanvarga qadar olib kirishda quyidagi tovarlar va transport vositalari uchun qonunchilikda nazarda tutilgan bojxona boji bo‘yicha imtiyozlari belgilangan:
Dor (osma) yo‘llari, tog‘-chang‘i ko‘targichlar, funikulyorlar va boshqa o‘xshash obyektlar, “banji-jamping” va “ziplayn” attraksionlari, boshqariladigan (dirijabl, havo shari) va boshqarilmaydigan (erkin uchish) aerostatlar, gondolalar, “rafting” va “flaybording” uchun uskunalar, mexanizmlar va ehtiyot qismlar, shuningdek, buggy car, fayetonlar, joylashtirish vositasi sifatida tunab qolish uchun jihozlangan (g‘ildirak ustidagi uylar) yoki kafe-furgonlarga aylantirilgan “fudtrak” yer usti transport vositalari, motorli qayiq va kvadrotsikllar.
Izoh (0)