Plug and Play платформаси жорий йил якунига қадар Тошкентда ўз офисини очиши ҳақида хабар қилди, деб ёзади IT Park Uzbekistan.
Ахборот технологиялари ва коммуникацияларини ривожлантириш вазирлиги, IT Park Uzbekistan ҳамда «АлоқаVentures» билан кечган учрашувлардан сўнг Plug and Play пойтахтда ўз ваколатхонасини ишга тушириши ҳақида расман эълон қилди.
Дастур доирасидаги ҳамкорликнинг дастлабки босқичи молиявий технологиялар, суғурта ва корпоратив технологиялар, ҳамда таълим йўналишларини қамраб олади.
Минтақадаги энг ёш ва жадал ривожланаётган экотизимлардан бири сифатида Plug and Play Ўзбекистоннинг маҳаллий корпоратив экотизимига ахборот технологиялари ва инновация соҳасида энг юқори халқаро стандартларга эришишда ёрдам беришни мақсад қилган, — дейди компания асосчиси ва бош ижрочи директори Саид Амиди.
Шу билан бирга, дастур дунёнинг етакчи стратегик бозорларида ўзига хос майдон тақдим этиш орқали маҳаллий истеъдодлар ва тадбиркорларни қўллаб-қувватлайди.
Офис маҳаллий корпорациялар ва агентликлар учун стартаплар билан яқиндан ҳамкорлик қилиш учун кўпроқ имкониятлар яратишга, қолаверса, минтақадаги стартап экотизимини жадаллаштиришга хизмат қилади.
Ҳамкорлик, шунингдек, стартапларга халқаро бозорга чиқишга ёрдам беради, негаки улар бутун дунё бўйлаб 40 дан ортиқ ваколатхоналардан иборат глобал тармоққа қўшилиш имкониятига эга бўладилар.
Plug and Play техник марказининг ташкил этилиши Ўзбекистон стартап экотизимлари учун улкан воқеадир. Бизнинг маҳаллий стартапларимиз марказ ваколатхоналари жойлашган 35 мамлакатда ўз лойиҳаларини намойиш этиш имкониятига эга бўлади, — дейди IT Park Uzbekistan директори Фарҳод Ибрагимов.
Унга кўра, бу Ўзбекистонлик стартап тадбиркорларга халқаро бозорда сифат ва рақобатбардошликни оширишга кўмак берибгина қолмай, мамлакатдан илк «яккашох» яратиш йўлида жипслаштиради ва экотизим ҳамкорларнинг ўз фаолиятларини кенгайтиришлари учун янги имкониятлар эшигини очади.
Изоҳ (0)