Litva Seymi (parlamenti) Rossiyani “terrorchi davlat” deb tan olish to‘g‘risidagi rezolyutsiyani bir ovozdan qabul qildi, deb xabar bermoqda Delfi.
“Qurolli kuchlari bombalash uchun tinch aholi obyektlarini ataylab va tizimli ravishda tanlab olayotgan Rossiya Federatsiyasi terrorizmni qo‘llab-quvvatlovchi va amalga oshiruvchi davlatdir”, — deyiladi hujjatda.
Seym Rossiya Qurolli kuchlari, uning siyosiy va harbiy rahbariyati tomonidan Ukrainaga qarshi tajovuzni genotsid deb tan oldi, shuningdek, maxsus xalqaro jinoiy tribunal tashkil etishga chaqirdi.
Litva parlamentariylariga ko‘ra, bunday tribunal davlat, hukumat rahbarlari va boshqa davlat amaldorlarini hibsga olish huquqiga ega bo‘lishi zarur.
Rossiyaning Ukrainaga bostirib kirishi ortidan Yevropa Ittifoqi davlatlari Rossiyaga nisbatan qattiq sanksiyalar joriy etdi. Litva rasmiylari ittifoqqa a’zo davlatlar ichida birinchi bo‘lib Rossiya gazidan butunlay voz kechdi, rossiyaliklarga qisqa muddatli vizalar berishni to‘xtatdi, Rossiya bilan diplomatik vakolatxona darajasini pasaytirdi va Rossiya elchisini mamlakatdan chiqarib yubordi.
Aprel oxirida Rossiya Davlat dumasining spikeri Vyacheslav Volodin Ukrainani “terrorchi davlat” deya tan olish zarurligini aytgandi.
Izoh (0)