Литва парламенти Россияни «террорчи давлат» деб эълон қилди

Литва Сейми (парламенти) Россияни «террорчи давлат» деб тан олиш тўғрисидаги резолюцияни бир овоздан қабул қилди, деб хабар бермоқда Delfi.

«Қуролли кучлари бомбалаш учун тинч аҳоли объектларини атайлаб ва тизимли равишда танлаб олаётган Россия Федерацияси терроризмни қўллаб-қувватловчи ва амалга оширувчи давлатдир», — дейилади ҳужжатда.

Сейм Россия Қуролли кучлари, унинг сиёсий ва ҳарбий раҳбарияти томонидан Украинага қарши тажовузни геноцид деб тан олди, шунингдек, махсус халқаро жиноий трибунал ташкил этишга чақирди.

Литва парламентарийларига кўра, бундай трибунал давлат, ҳукумат раҳбарлари ва бошқа давлат амалдорларини ҳибсга олиш ҳуқуқига эга бўлиши зарур.

Россиянинг Украинага бостириб кириши ортидан Европа Иттифоқи давлатлари Россияга нисбатан қаттиқ санкциялар жорий этди. Литва расмийлари иттифоққа аъзо давлатлар ичида биринчи бўлиб Россия газидан бутунлай воз кечди, россияликларга қисқа муддатли визалар беришни тўхтатди, Россия билан дипломатик ваколатхона даражасини пасайтирди ва Россия элчисини мамлакатдан чиқариб юборди.

Апрель охирида Россия Давлат думасининг спикери Вячеслав Володин Украинани «террорчи давлат» дея тан олиш зарурлигини айтганди.