Bugun,

  • USD 11095.31
  • RUB 173.84
  • EUR 10772.44

Kanada parlamentining quyi palatasi – Jamoalar palatasi Rossiyaning Ukrainadagi harakatlarini genotsid deb atovchi rezolyutsiyani bir ovozdan ma’qulladi, deb xabar bermoqda Kanadaning Global News nashri.

Foto: AP Photo

Foto: AP Photo

Qarorda aytilishicha, Ukraina hududida Rossiya qo‘shinlari tomonidan “tizimli va ommaviy harbiy jinoyatlar hamda insoniyatga qarshi jinoyatlar sodir etilgani haqida aniq va yetarli dalillar” mavjud.

Jamoalar palatasida rezolyutsiya bo‘yicha rasmiy ovoz berish o‘tkazilmagan. Hujjat majburlov xususiyatiga ega emas va Kanada hukumatini biror chora ko‘rishga majbur qilmaydi. Xalqaro huquqqa ko‘ra, buning oqibatlari ham bo‘lmaydi.

Rezolyutsiya Jamoalar palatasiga Yangi Demokratik partiya deputati Xizer Makferson tomonidan taqdim etilgan. Uning so‘zlariga ko‘ra, shu yo‘l bilan u Kanada hukumatini Rossiyaga qarshi keyingi choralar ko‘rishga, xususan, yangi sanksiyalar joriy etishga undamoqchi bo‘lgan.

“Bu Ukrainadagi mojaro tugamaganini, biz ko‘rsatayotgan yordam yetarli emasligini va Ukraina xalqi uchun ko‘proq ish qilishimiz kerakligini bildirishning bir usuli”, — deya undan iqtibos keltirgan Kanadaning CBC telekompaniyasi.

Eslatib o‘tamiz, avvalroq Rossiya armiyasining Ukrainadagi harakatlari Estoniya va Latviya parlamentlari tomonidan genotsid deb e’lon qilingan edi.

Genotsid jinoyatining oldini olish va jazolash to‘g‘risidagi konvensiyaga ko‘ra, genotsid — milliy, etnik, irqiy yoki diniy guruhni to‘liq yoki qisman yo‘q qilishga qaratilgan harakat. Konvensiyada BMT Xalqaro jinoiy sudi ma’lum bir guruhga qarshi genotsid sodir etilganmi yoki yo‘qmi, buni hal qilish huquqiga ega ekani aytilgan. BMT sudi hozircha Rossiyaning Ukrainadagi harakatlarini genotsid deb atamagan.

Ukraina prezidenti Vladimir Zelenskiy va AQSH prezidenti Jo Bayden Rossiya-Ukraina urushida sodir bo‘layotgan voqealarni genotsid deb atagan edi (shu bilan birga, Oq uy bu Baydenning shaxsiy fikri ekanini ta’kidlagan). Fransiya prezidenti Emmanuel Makron Ukrainadagi voqealarga nisbatan “genotsid” so‘zini ishlatishni istamagan.

Rossiya Ukrainadagi askarlarining harakatlarini genotsid deb hisoblashdan bosh tortmoqda. Shu bilan birga, Rossiya rasmiylari 2014-yildan keyin Donbassdagi harbiy harakatlar bilan bog‘liq voqealarni genotsid deb ataydi. Bu Ukrainaga bostirib kirishining sabablaridan biri sifatida ham ko‘rsatilgan. BMT Bosh kotibi Antoniu Guterrish Donbassdagi voqealarni genotsid deb hisoblashdan bosh tortgan.

Kanadadagi ukrain diasporasi dunyodagi ikkinchi eng yirik ukrain diasporasi hisoblanadi. Mamlakatda ukrain millatiga mansub 1,4 millionga yaqin odam yashaydi.

Izoh
Asosiy yangiliklar
Dunyo
Ilon Mask Twitter’da Apple reklamalari tiklanganini e’lon qildi
Dunyo
Turkiyaning Kizilelma qiruvchi droni ilk parvozni amalga oshirdi (video)
Dunyo
Xitoy Rossiyaga harbiy yordam ko‘rsatdimi?