Afg‘onistonda hokimiyat tepasida bo‘lgan “Tolibon” harakati Panjsher viloyatidagi Milliy qarshilik fronti bilan kechgan qizg‘in janglardan so‘ng viloyatdagi qo‘shinlari sonini 5 minggacha oshirdi. Bu haqda TOLOnews telekanali “Tolibon” ma’muriyatining Panjsherdagi vakili Abubakr Siddiqiyga asoslanib xabar berdi.
Ushbu viloyatda Milliy qarshilik frontining kuchlari va “Tolibon” harakati o‘rtasida shiddatli to‘qnashuvlar 6-maydan 7-mayga o‘tar kechasi sodir bo‘lgan. Oqibatda qarshilik kuchlari o‘tgan yilning sentabr oyidan beri birinchi marta butun bir tumanni o‘z nazoratiga olishga muvaffaq bo‘ldi. Ular Dara tumanidagi “Tolibon” kuchlarini qisman yo‘q qilishga yoki ularni tor-mor etishga muvaffaq bo‘ldi.
Siddiqiyning so‘zlariga ko‘ra, janglar oqibatida toliblar besh nafar odamini yo‘qotgan, ikki nafari yaralangan. Shuningdek, uning aniqlik kiritishicha, o‘lganlarning jasadlari tug‘ilib o‘sgan viloyatlariga dafn qilish uchun yuborilgan. Ayni vaqtda Milliy qarshilik fronti o‘z kuchlari “Tolibon”ning 27 nafar jangarisini o‘ldirganini da’vo qilmoqda. Shu bilan birga ular olti nafar jangchisi halok bo‘lganini tan oldi. Siddiqiyning da’vo qilishicha, “Tolibon” kamida 10 nafar qarshilik jangchisini o‘ldirishga muvaffaq bo‘lgan.
“Tolibon” 6—7-may kunlari Panjsherda faol janglar bo‘lganini dastlab butunlay rad etgan edi.
Hozirda Dara tumanini kim nazorat qilayotgani haqida bir-biriga qarama-qarshi xabarlar bor. Panjsherdagi “Tolibon” hukumati tumandagi vaziyat ustidan nazorat o‘rnatganini da’vo qilmoqda. Milliy qarshilik fronti vakillarining so‘zlariga ko‘ra, ular nazorat zonasini Daraga tutash tumanlarga kengaytirgan.
Aamaj News xabariga ko‘ra, Panjsherda qarshilik fronti tomonidan mag‘lubiyatga uchraganidan so‘ng “Tolibon” sakkiz nafar tinch aholini qarshilik kuchlari bilan aloqada bo‘lganlikda ayblab, hibsga olgan, qiynoqqa solgan va o‘ldirgan. Ular orasida ayol kishi ham borligi aniqlangan.
Izoh (0)