Buyuk Britaniya qirolichasi Yelizaveta II 10-may kuni bo‘lib o‘tadigan parlament sessiyasining an’anaviy ochilish marosimida ishtirok etmaydi, deb ma’lum qildi Bukingem saroyi. Uning o‘rniga tantanali nutqni o‘g‘li shahzoda Charlz o‘qiydi.
BBC News xabariga ko‘ra, 21-aprel kuni 96 yoshga to‘lgan qirolicha so‘nggi daqiqalargacha Vestminsterdagi marosimda ishtirok etishni xohlagan, biroq “harakatlanishdagi kichik muammolari” tufayli oxir-oqibat bundan voz kechishga majbur bo‘lgan.
2022-yilda Yelizaveta II Vindzor qasridan tashqaridagi faqat bitta ommaviy tadbirda — Vestminster abbatligida marhum turmush o‘rtog‘i shahzoda Filippni xotirlash marosimida qatnashdi.
Qirolicha Yelizaveta II 70 yillik hukmronligi mobaynida yillik tantanali nutqini atigi ikki marta — 1959 va 1963-yillarda o‘tkazib yuborgan. O‘shanda ikki safarda ham uning homiladorlik vaqti bo‘lgan.
Yelizaveta II ning Buyuk Britaniya qirolligi taxtiga o‘tirganiga 70 yil to‘lishi munosabati bilan asosiy tantanalar iyun oyida bo‘lib o‘tadi, ularda qirolichaning ishtiroki qanday bo‘lishi haqida hozircha ma’lumotlar mavjud emas.
Izoh (0)