Fransiya prezidenti Emmanuel Makron Yevropa Ittifoqiga xos qadriyatlarga ega bo‘lgan, lekin uning tarkibiga kirmagan davlatlar uchun Yevropa davlatlari o‘rtasida hamkorlikning yangi formatini yaratishni taklif qildi.
Xususan, Fransiya rahbari Ukrainaning YIga qo‘shilish jarayoni bir necha yil, hatto o‘nlab yillar davom etishi mumkinligini ta’kidladi.
“Biz hammamiz yaxshi bilamizki, Yevropa Ittifoqiga kirishga ruxsat berish jarayoni bir necha yil va hatto o‘nlab yillar davom etadi. Agar Ittifoqqa kirish standartlarini pasaytirishga qaror qilmasak, albatta”, — dedi Makron Strasburgdagi Yevropa parlamentida so‘zlagan nutqida.
Shuningdek, u Ukrainadagi mojaroni tinch yo‘l bilan hal etish Rossiyani kamsitish orqali amalga oshirilmasligi kerakligini ta’kidladi.
“Ertaga biz tinchlik o‘rnatishimiz kerak. Buni unutmaslik lozim. Bu esa Ukraina va Rossiya ishtirokidagi muzokaralar stolida bo‘lishi zarur. Mazkur muhokamalarning shartlarini ular belgilaydi. Ammo bu jarayon inkor qilish, bir-birini istisno qilish va ayniqsa kamsitish bilan amalga oshirilmaydi”, — dedi Makron.
Makronning taklifida ko‘zda tutilgan formatda Yevropa Ittifoqiga a’zolikni qo‘llab-quvvatlovchilar ham, undan chiqib ketgan davlatlar, masalan, Buyuk Britaniya ham “Yevropa siyosiy hamjamiyati” deb ataladigan tashkilotning bir qismiga aylanishi mumkin.
Mart oyida Makron YIga a’zolikni olish tartibini jangovar harakatlar olib borilayotgan davlatga ochib bo‘lmasligini ta’kidlagan edi. 8-aprel kuni Yevropa Komissiyasi rahbari Ursula fon der Lyayyen Kiyevga tashrifi chog‘ida Ukraina prezidenti Vladimir Zelenskiyga Yevropa Ittifoqiga kirish so‘rovnomasini bergan, o‘n kundan so‘ng esa Zelenskiy to‘ldirilgan so‘rovnomani YIning Ukrainadagi delegatsiyasi rahbari Matti Maasikasga topshirgan.
9-may kuni Zelenskiy Kiyev Ukrainaga YI a’zoligiga nomzod davlat maqomini olish uchun anketaning ikkinchi va yakuniy qismini to‘ldirib bo‘lganini ma’lum qilgan.
Izoh (0)