“Rossiya bilan rublda savdo qilish O‘zbekiston uchun katta xavf tug‘dirmaydi” — Shuhrat Vafoyev

Toshkentda bo‘lib o‘tgan “Innoprom” forumida xalqaro savdoda milliy valyutalardan foydalanish masalasi muhokama qilindi. Bu haqda “RBK” xabar berdi.

“Mamlakatlar o‘rtasidagi tovar ayirboshlashda hisob-kitoblar milliy valyutada amalga oshirilsa, bu muqarrar va juda yaxshi trend deb hisoblayman , — dedi O‘zbekiston Investitsiyalar va tashqi savdo vaziri o‘rinbosari Shuhrat Vafoyev.

Uning so‘zlariga ko‘ra, MDH davlatlarining valyutalari hali juda yosh va ularga ishonch paydo bo‘lishi uchun vaqt kerak.

“Rossiya rubliga kelsak, aytishimiz mumkinki, u shu darajaga chiqdi va O‘zbekiston savdoda rubldan foydalanishni boshlab bo‘lgan. Umid qilamanki, ikki tomonlama savdoda bunday hisob-kitob shakli ko‘payadi”, — deydi vazir o‘rinbosari.

Vafoyevga ko‘ra, Rossiya bilan rublda savdo qilish O‘zbekiston uchun katta xavf tug‘dirmaydi, chunki mamlakat eksport qilganidan ko‘ra ko‘proq import qiladi. Shu sabab, O‘zbekistonga har doim ko‘proq rubl kerak bo‘ladi.

Bundan tashqari, O‘zbekiston savdoda yuan ulushini ham oshirishni rejalashtirmoqda.

Avvalroq Shuhrat Vafoyev O‘zbekistonga ko‘chib kelayotgan IT-mutaxassislar haqida fikr bildirgan edi.