Тошкентда бўлиб ўтган «Иннопром» форумида халқаро савдода миллий валюталардан фойдаланиш масаласи муҳокама қилинди. Бу ҳақда «РБК» хабар берди.
«Мамлакатлар ўртасидаги товар айирбошлашда ҳисоб-китоблар миллий валютада амалга оширилса, бу муқаррар ва жуда яхши тренд деб ҳисоблайман , — деди Ўзбекистон Инвестициялар ва ташқи савдо вазири ўринбосари Шуҳрат Вафоев.
Унинг сўзларига кўра, МДҲ давлатларининг валюталари ҳали жуда ёш ва уларга ишонч пайдо бўлиши учун вақт керак.
«Россия рублига келсак, айтишимиз мумкинки, у шу даражага чиқди ва Ўзбекистон савдода рублдан фойдаланишни бошлаб бўлган. Умид қиламанки, икки томонлама савдода бундай ҳисоб-китоб шакли кўпаяди», — дейди вазир ўринбосари.
Вафоевга кўра, Россия билан рублда савдо қилиш Ўзбекистон учун катта хавф туғдирмайди, чунки мамлакат экспорт қилганидан кўра кўпроқ импорт қилади. Шу сабаб, Ўзбекистонга ҳар доим кўпроқ рубль керак бўлади.
Бундан ташқари, Ўзбекистон савдода юань улушини ҳам оширишни режалаштирмоқда.
Аввалроқ Шуҳрат Вафоев Ўзбекистонга кўчиб келаётган IT-мутахассислар ҳақида фикр билдирган эди.
Изоҳ (0)