Ijtimoiy tarmoqlarda “Arnasoy” yozuvi tushirilgan tez tibbiy yordam avtomashinasi yonida bemor zambildan beixtiyor yerga yiqitib yuborilgani aks etgan videolavha tarqaldi. Sog‘liqni saqlash vazirligi holatga munosabat bildirdi.
Aniqlanishicha, 23—24-aprel kunlari Jizzax viloyati Arnasoy tumanida uyushmagan yoshlar o‘rtasida “Quvnoqlar va zukkolar” respublika ko‘rik-tanlovi o‘tkazilgan. Ushbu videorolik tuman madaniyat markazi rejissori B.Ayyubov tomonidan hududdagi “G‘afur G‘ulom”, “G‘oliblar”, “Bobur” va “Oltin vodiy” mahalla fuqarolar yig‘inlari yoshlaridan iborat “Shovvozlar” terma jamoasi uchun maxsus suratga olingan.
Shundan so‘ng bu lavha mazkur jamoa a’zolarining ijtimoiy tarmoqlardagi shaxsiy sahifalariga “Quvnoqlar va zukkolar uchun maxsus” tag so‘zi ostida joylangan. Ammo keyinchalik ayrim blogerlar tomonidan noto‘g‘ri talqin qilingan holda internet tarmoqlariga tarqatib yuborilgan.
“Videolavhada aks etgan noxush holatga mamlakatimiz tez tibbiy yordam tizimi, xususan, Arnasoy tuman tibbiyot birlashmasi tez tibbiy yordam brigadasi xodimlarining mutlaqo aloqasi yo‘q.
Shu bois vazirlik fuqarolardan ijtimoiy tarmoqlarda tibbiyot xodimlari obro‘siga putur yetkazadigan bu kabi asossiz axborot va videolavhalarni tarqatmasliklarini so‘rab qoladi”, — deyiladi xabarda.
Mavzuga doir:
- “Belgilangan me’yorlarda kiyinish qat’iy belgilab qo‘yilgan”. SSV tibbiyot muassasalarida hijobga ruxsat berilgani haqidagi xabarlarga munosabat bildirdi
- SSV Toshkentda hamshiralarning Qizil yarim oy jamiyatiga “o‘z xohishi bilan” pul o‘tkazayotgani aytilgan xabarga munosabat bildirdi
- SSVning soxta veb-sayti yaratildi. Unda vaksina olgan fuqarolarga 750 ming so‘m berilishi aytiladi
Izoh (0)