Ижтимоий тармоқларда «Нурафшон ТВ» телеканалининг Тошкент вилояти Олмалиқ шаҳрида бўлиб ўтган сайёр тиббий қабул жараёнидан тайёрланган видеолавҳасида беморлар уй ҳайвонларини текшириш учун мўлжалланган УТТ аппарати ёрдамида кўрикдан ўтказилганига доир хабарлар тарқалди. Вилоят Соғлиқни сақлаш бошқармаси мазкур ҳолатга муносабат билдириб, тиббий кўрик жараёнида замонавий ультратовуш ускунасидан фойдаланилганини маълум қилди.
Маълум қилинишича, Олмалиқ шаҳридаги тиббий кўрик жараёнида фойдаланилган УТТ аппарати ижтимоий тармоқларда тарқалган хабарларда айтилганидек, Хитойда ишлаб чиқарилган ветеринар текширувларга мўлжалланган Esaote Aquila VET қурилмаси эмас.
Таъкидланишича, Esaote қурилмаси Италия компаниясига тегишли ҳисобланади ва компания томонидан 2000 йиллар бошида Esaote Akuila VЕТ модели остида ҳам қурилма ишлаб чиқарила бошлаган. Бироқ видеолавҳада кўрсатилган аппарат эса Esaote Akuila PRО деб номланади. У умумий клиник ультратовуш, яъни инсонларни тиббий кўрикдан ўтказиш, диагностика қилиш учун мўлжалланган.
№531808045 серияли мазкур ускуна Олмалиқ шаҳар туғуруқ комплексига 2008 йилда «Саломатлик-2» дастури доирасида келтирилган. У ҳозирги кунга қадар соз ҳолатда.
Esaote Akuila PRO аппарати ҳам ихчам ва фойдаланиш учун қулай бўлган портатив мобил қурилма ҳисоблангани туфайли ундан сайёр тиббий кўриклар ва уйда ётиб қолган беморлар текширувида фойдаланилади.
Шунингдек, ультратовуш диагностика аппарати тиббиётнинг турли йўналишларида ишлатилиши ва тана аъзоларининг эхографик тасвирини ҳосил қилиб беришга хизмат қилади. Бунда тасвирнинг ёрқинлиги ва контраст кўрсаткичлари асосий сифат мезони ҳисобланади. Яъни тўқималарни бир-биридан ажратиш ва таркибий тузилмаларини кўрсата олиш ҳисобига УТТ шифокори ички аъзолар ҳолатига баҳо бера олади. Қайд этилишича, Esaote Akuila PRO аппарати орқали олинаётган тасвирлар ана шу талабларга жавоб беради.
«Умуман, мамлакатимиз соғлиқни сақлаш тизимида бугунги кунда замонавий ультратовуш ускуналари қўлланилмоқда. Шу ўринда бир мисол: 2018 йилда бирламчи тизимда пренатал нуқсонларни аниқлаш мақсадида давлат томонидан GЕ компаниясидан 200 та, 2020 йилда қишлоқ шифокор пунктларида ишлатиш учун яна 800 та сўнгги русумдаги стационар аппаратлар сотиб олинган. Шундай экан, блогерлардан ижтимоий тармоқлар орқали асоссиз, текширилмаган ва нотўғри маълумотларни тарқатмасликларини сўраймиз», — дея таъкидланади муносабатда.
Изоҳ (0)