Бир неча кундирки, Тошкент истеъмолчилари 2022 йилги мавсумнинг яна бир янгилиги – халқ орасида «Май олмалари» деб аталадиган эрта пишар олмани татиб кўриш имкониятига эга бўлди. Бу ҳақда EastFruit хабар берди.
Номига қарамай, бу олма нави апрель ойининг иккинчи ярмида ёки охирларида чакана савдода пайдо бўлади.
Бу мавсумнинг биринчи янги олмаси, шунинг учун у қиммат. Узоқ кутилган мева баҳоси 2021 йил ҳосилининг кечпишар олмасидан ўртача 7-8 баравар қимматроқ.
Жорий йилнинг 20—23 апрель кунлари Тошкент супермаркетларида эртапишар олмалар пайдо бўлди ва 100 грамми 11 700 сўмдан 12 999 сўмгача бўлган нархларда сотилди, яъни 1 кило олма нархи 117 000 сўмдан 129 990 сўмгача баҳоланди.
Айни дамда маҳаллий ишлаб чиқарилган ушбу олма нави гилос ва ўриклардан сўнг энг қиммат мевалардан бири бўлиб, импорт экзотик мевалардан қимматроқ туради.
Таққослаш учун, 2022 йил 26 апрель ҳолатига кўра, пойтахт супермаркетларида ўтган йилги ҳосилдаги олмаларнинг чакана нархи — 1 кг учун 12 000 сўмдан 23 000 сўмгача.
Эслатиб ўтамиз, 2021 йилда мавсумнинг ушбу янгилиги чакана савдоларда 19 апрелда 100 грамми 14 999 сўм бўлган, яъни килограмми 149 990 сўм.
Бошқача қилиб айтганда, 2022 йилда май олмалари чакана савдода ўтган йилги билан бир вақтда сотувга чиққан бўлса ҳам, 2021 йилга нисбатан ўртача 18 фоизга арзонроқ нархланди.
Бу фарқ жорий йилги совуқ оқибатида ҳосил йўқотишлари камроқ бўлгани билан боғланмоқда.
Аввалроқ киви ва мандарин арзонлагани, узум ва булғор қалампири кескин қимматлашгани ҳақида хабар берилган эди.
Изоҳ (0)