O‘zbekistonda eng kam va eng ko‘p ishlab chiqaruvchi viloyatlar ma’lum bo‘ldi

O‘zbekistonda hududlar bo‘yicha Yalpi hududiy mahsuloti (YHM) ma’lum bo‘ldi. Bu haqda Davlat statistika qo‘mitasi xabar bermoqda.

YHM – Milliy hisoblar tizimining asosiy ko‘rsatkichlaridan biri bo‘lib, muayyan davrda mintaqaning iqtisodiy hududida joylashgan rezident – institutsional birliklar ishlab  chiqarish faoliyatining yakuniy natijasini ifodalaydi.

O‘zbekistonning 2022-yil birinchi chorakda YHMsi 162,78 trln so‘m bo‘ldi. 

2022-yil yanvar-mart oylarida YHMni shakllantirishda eng katta ulushga Toshkent shahri egalik qildi — 18,9 foiz. Ikkinchi o‘rinni Toshkent viloyati (11,6 foiz) egallagan bo‘lsa, uchinchi pog‘onada Navoiy viloyati (9 foiz) qayd etilgan. Jizzax va Sirdaryo viloyatlari bu borada eng kam ulushga ega bo‘lgan — mos ravishda 2,6 foiz va 1,9 foiz.

Aholi jon boshiga YHM hisoblanganda bu borada yetakchilikni Navoiy viloyati qo‘lga kiritdi. Viloyatda YHM jon boshiga 14,2 mln so‘mdan to‘g‘ri kelmoqda. Bu borada Toshkent shahri va Toshkent viloyati ikkinchi va uchinchi o‘rinlarni egalladi. Toshkent shahrida jon boshiga to‘g‘ri keladigan YHM 10,6 mln so‘m bo‘lgan bo‘lsa, Toshkent viloyatida 6,4 mln so‘m bo‘ldi.

O‘zbekistonda 2022-yilning dastlabki choragi uchun aholi jon boshiga to‘g‘ri keladigan YHM 4,6 mln so‘m bo‘lmoqda.

Avvalroq O‘zbekistonda yalpi ichki mahsulot hajmi 5,8 foizga oshgani haqida xabar berilgandi.