Falastinliklar va Isroil xavfsizlik kuchlari o‘rtasidagi taranglik so‘nggi kunlarda yana kuchaydi. Ziddiyatning yangi bosqichi muqaddas Ramazon oyiga to‘g‘ri keldi. 15-aprel, juma tongida Quddusning Ma’bad tog‘idagi ham musulmonlar, ham yahudiylar uchun muqaddas bo‘lgan al-Aqso masjidi atrofida ikki tomonning to‘qnashuvi boshlandi. Bu paytda masjidda 12 mingga yaqin musulmon namozga yig‘ilgandi.
Isroil tomoni falastinliklarni ibodatga kelgan yahudiylarga va ularni qo‘riqlab kelgan politsiya xodimlariga tosh otganlikda aybladi. Ushbu da’vo bilan Isroil kuchlari falastinliklarga qarshi ko‘zni yoshlatuvchi gaz va rezina o‘qlardan foydalandi. Ijtimoiy tarmoqlarda isroillik politsiyachilarning falastinliklarga kuch ishlatayotgani aks etgan videolar tarqaldi. O‘sha kungi tartibsizliklarda 150 ga yaqin falastinlik jarohatlangan.
17-aprel, yakshanba kuni Ma’bad tog‘ida falastinliklar va isroilliklar o‘rtasida yana to‘qnashuvlar yuz bergan. Ularda 20 dan ortiq kishi jarohatlangan. Isroil politsiyasi yakshanba kuni ertalab yahudiylarning Ma’bad tog‘iga rejalashtirilgan tashrifidan sal oldin, “yuzlab” falastinlik namoyishchilar tosh uyumlarini yig‘a boshlaganini aytdi. Ular namoyishchilarni “tarqatish” va “tartibni tiklash” maqsadida vaziyatga aralashganini da’vo qildi. Falastin Qizil Yarim Oy Jamiyatining ma’lumotlariga ko‘ra, 19 nafar falastinlik yaralangan, ulardan besh nafari kasalxonaga yotqizilgan. Ba’zilariga rezina o‘q teggan.
OAV guvohlarga tayanib, 19-aprel kuni Falastinning Burqa shaharchasida isroilliklarga qarshi miting o‘tkazgan falastinliklar Isroil armiyasi kuchlari bilan to‘qnashgani haqida xabar berdi.
Isroil G‘azoga raketalardan zarba yo‘lladi
Isroil harbiy-havo kuchlari 18-aprelga o‘tar kechasi G‘azodagi nishonlarga aviazarba berdi va qurol ishlab chiqaruvchi zavodni vayron qildi. Isroil harbiylarining ta’kidlashicha, bu G‘azodan Isroilga qarshi uchirilgan raketalarga javob bo‘lgan.
Harbiylarning iddao qilishicha, G‘azo sektoridan Isroil janubiga raketalar uchirilgan, ulardan bittasi “Temir gumbaz” raketaga qarshi mudofaa tizimi tomonidan tutib olingan.
Falastin—Isroil o‘rtasidagi yangi mojaroga birinchilardan bo‘lib, Iordaniya qiroli Abdulla II munosabat bildirdi. U Isroil xavfsizlik kuchlarining Quddusdagi falastinliklarga qarshi harakatlari tinchlikka tahdid solayotganini aytdi.
Monarx bunday harakatlar mintaqada tinchlik o‘rnatish istiqbollariga jiddiy putur yetkazishini ta’kidladi.
Falastin—Isroil nizosi oxirgi marta 2021-yilning may oyida eng kuchli avj olgandi. O‘shanda Quddusdagi arab namoyishchilar va Isroil politsiyasi o‘rtasidagi to‘qnashuvlar yuz bergan. Vaziyatga HAMAS aralashgan. Isroil uning politsiyani olib ketish haqidagi talablarini bajarmaganidan keyin, guruh raketalar otishni boshlagan. Bunga javoban Isroil G‘azo sektorini o‘qqa tutgan.
Mavzuga doir: G‘olibsiz urush. Falastin—Isroil mojarosi haqida
Izoh (0)