G‘azo sektoridan Isroil hududi bo‘ylab o‘tgan tunda 200 ga yaqin raketa uchirildi, deb yozmoqda The Times of Israel nashri.

Foto: AP

Harbiylarning ma’lumotlariga ko‘ra, “temir gumbaz” raketaga qarshi mudofaa tizimi o‘nlab raketalarni to‘xtatib qoldi.

Isroil harbiylari bunga javoban G‘azo sektoridagi 130 ga yaqin obyektga zarba berdi. Isroil Mudofaa armiyasining xabar berishicha, javob zarbasi natijasida Isroilga raketa uchirgan Falastin guruhlarining 15 nafar a’zosi qurbon bo‘ldi.

10-may kuni G‘azo sektoridan navbatdagi raketa uchirilgach, Isroil javob zarbasini berdi. Shundan so‘ng, Falastin anklavining Sog‘liqni saqlash vazirligi G‘azo sektorida 21 kishining halok bo‘lgani va yana 75 kishining jarohat olganini ma’lum qildi.

Raketa hujumlari Isroil politsiyasi va falastinliklar o‘rtasida to‘qnashuvlar sodir bo‘layotgan Sharqiy Quddusdagi keskinlik kuchaygan bir paytda yuz bermoqda. 7-may kuni Isroil sudining qaroriga binoan Ma’bad tog‘lari yaqinidagi “Shayx Jarrah” mahallasidan arab oilalarini ko‘chirib yuborish jarayoni boshlangan edi. Buning natijasida hududda norozilik namoyishlari va to‘qnashuvlar yuzaga keldi.

Ma’lumot uchun, Quddusning Ma’bad tog‘idagi al-Aqso masjidida Isroil politsiyasi bilan yuzaga kelgan to‘qnashuvda 278 nafar falastinlik jarohatlandi.

Associated Press xabariga ko‘ra, politsiya yahudiylarga 10-may — Quddus kuni nishonlanadigan sanada islomning uchinchi muhim ziyoratgohi bo‘lgan al-Aqsoga tashrif buyurishni taqiqlagan. Quddus kuni 1967-yilgi olti kunlik urushdan so‘ng sharqiy Quddusning Isroil nazorati ostiga o‘tishini yodga olish kuni hisoblanadi. Bu yil Quddus kuni musulmonlarning muqaddas Ramazon oyiga to‘g‘ri kelmoqda.

Checheniston rahbari Ramzan Qodirov Isroil politsiyasining Ramazon oyida bu harakatlarini tanqid qildi va “kerak bo‘lsa, al-Aqsoni qutqarish va o‘z e’tiqodi uchun jonini ayamasligi”ni ta’kidladi.