Quddusda politsiya bilan to‘qnashuvlarda 280 ga yaqin falastinlik jarohat oldi (foto)

Quddusning Ma’bad tog‘idagi al-Aqsa masjidida Isroil politsiyasi bilan yuzaga kelgan to‘qnashuvda 278 nafar falastinlik jarohat oldi. Bu haqda The Times of Israel gazetasiga tayanib, “RBK” xabar berdi.

“Ma’lumotlarga ko‘ra, 205 kishi kasalxonaga yotqizilgan, shulardan besh nafarining ahvoli og‘ir”, — deyiladi xabarda. Kamida 13 kishi ko‘zdan yosh oqizuvchi gaz bilan bevosita hujumga uchrashi oqibatida jarohat olgan.

Avvalroq WAFA agentligi ko‘p sonli politsiyachilar 10-mayga o‘tar kechasi al-Aqsa masjidi majmuasi hududiga bostirib kirgani haqida xabar bergan edi. Unga ko‘ra, xavfsizlik kuchlari rezina o‘qlar, fleshgranatalar va ko‘zdan yosh oqizuvchi gazlardan foydalangan.

Politsiya, o‘z navbatida, tartibsizliklar ortida ekstremistlar turganini hamda qonun va tartib kuchlari “ekstremistlarning jamoat xavfsizligiga zarar yetkazishiga yo‘l qo‘ymasligini” aytgan. Ta’kidlanishicha, ekstremistlar minglab yahudiylar ibodat qilish uchun yig‘ilgan G‘arbiy devor yaqinidagi joy va politsiya xodimlariga tosh otgan.

Associated Press xabariga ko‘ra, politsiya yahudiylarga 10-may — Quddus kuni nishonlanadigan sanada islomning uchinchi muhim ziyoratgohi bo‘lgan al-Aqsaga tashrif buyurishni taqiqlagan. Quddus kuni 1967-yilgi olti kunlik urushdan so‘ng sharqiy Quddusning Isroil nazorati ostiga o‘tishini yodga olish kuni hisoblanadi. Bu yil Quddus kuni musulmonlarning muqaddas Ramazon oyiga to‘g‘ri kelmoqda.

Sharqiy Quddusdagi vaziyat 7-may oqshomida keskinlashdi. To‘qnashuvlar shaharning ikki hududida: Ma’bad tog‘i yaqinida va “Shayx Jarrah” mahallasida sodir bo‘lgan. Isroil sudi qarori bilan u yerdagi bir qator arab oilalarining chiqarib yuborilayotgani noroziliklarga sabab bo‘lgan.

O‘shanda falastinliklar va Isroil xavfsizlik kuchlari o‘rtasidagi to‘qnashuvlar oqibatida 200 dan ortiq odam jarohat oldi, ulardan 88 nafari kasalxonaga yotqizildi.