Buyuk Britaniya bosh vaziri Boris Jonson koronavirus cheklovlarini buzgan holda o‘tkazilgan bazmda ishtirok etgani uchun parlamentdan kechirim so‘radi, deb xabar beradi Deutsche Welle.
Nashr ma’lumotlariga ko‘ra, britaniyalik siyosatchi lokdaun vaqtida noqonuniy uyushtirilgan bazmdagi ishtiroki uchun politsiya tomonidan jarimaga tortilganidan beri birinchi marta Buyuk Britaniya parlamenti qonunchilari qarshisiga chiqqan.
“Vaziyatdan foydalanib, yig‘ilishning birinchi kunidanoq Jamoatchilik palatasi qarshisida chin ko‘ngildan so‘ragan uzrimni qaytarmoqchiman. Xabarnomani olishim bilan aybimni tan oldim, odamlar o‘zining bosh vaziridan munosib harakatlarni kutishga haqli”, — deydi Jonson.
Jonsonning ma’lum qilishicha, u qoidani ataylab buzmagan va parlamentni chalg‘itish niyatida bo‘lmagan, shu sababli iste’fo berish niyatida emas.
“Na o‘shanda va na undan keyin Vazirlar Mahkamasi zalida juda muhim COVID strategiyasi yig‘ilishi oldidan to‘planish qoida buzilishiga tenglashtirilishi mumkinligi xayolimga ham kelmagan. Qaytaraman, bu mening xatoyim edi va men bu uchun chin dildan uzr so‘rayman”, — deydi bosh vazir.
Ta’kidlash kerakki, Britaniya siyosiy elitasi koronavirus pandemiyasi vaqtida Partygate nomini olgan bir nechta bazmlarda ishtirok etgan. Politsiya ma’lumotlariga ko‘ra, Jonson bu kabi tadbirlarning kamida oltitasida qatnashgan.
Mavzuga doir: Britaniya sog‘liqni saqlash vaziri ma’shuqasi bilan karantin qoidalarini buzgani uchun iste’foga chiqdi
Izoh (0)