Фаластинликлар ва Исроил хавфсизлик кучлари ўртасидаги таранглик сўнгги кунларда яна кучайди. Зиддиятнинг янги босқичи муқаддас Рамазон ойига тўғри келди. 15 апрель, жума тонгида Қуддуснинг Маъбад тоғидаги ҳам мусулмонлар, ҳам яҳудийлар учун муқаддас бўлган ал-Ақсо масжиди атрофида икки томоннинг тўқнашуви бошланди. Бу пайтда масжидда 12 мингга яқин мусулмон намозга йиғилганди.
Исроил томони фаластинликларни ибодатга келган яҳудийларга ва уларни қўриқлаб келган полиция ходимларига тош отганликда айблади. Ушбу даъво билан Исроил кучлари фаластинликларга қарши кўзни ёшлатувчи газ ва резина ўқлардан фойдаланди. Ижтимоий тармоқларда исроиллик полициячиларнинг фаластинликларга куч ишлатаётгани акс этган видеолар тарқалди. Ўша кунги тартибсизликларда 150 га яқин фаластинлик жароҳатланган.
17 апрель, якшанба куни Маъбад тоғида фаластинликлар ва исроилликлар ўртасида яна тўқнашувлар юз берган. Уларда 20 дан ортиқ киши жароҳатланган. Исроил полицияси якшанба куни эрталаб яҳудийларнинг Маъбад тоғига режалаштирилган ташрифидан сал олдин, «юзлаб» фаластинлик намойишчилар тош уюмларини йиға бошлаганини айтди. Улар намойишчиларни «тарқатиш» ва «тартибни тиклаш» мақсадида вазиятга аралашганини даъво қилди. Фаластин Қизил Ярим Ой Жамиятининг маълумотларига кўра, 19 нафар фаластинлик яраланган, улардан беш нафари касалхонага ётқизилган. Баъзиларига резина ўқ тегган.
ОАВ гувоҳларга таяниб, 19 апрель куни Фаластиннинг Бурқа шаҳарчасида исроилликларга қарши митинг ўтказган фаластинликлар Исроил армияси кучлари билан тўқнашгани ҳақида хабар берди.
Исроил Ғазога ракеталардан зарба йўллади
Исроил ҳарбий-ҳаво кучлари 18 апрелга ўтар кечаси Ғазодаги нишонларга авиазарба берди ва қурол ишлаб чиқарувчи заводни вайрон қилди. Исроил ҳарбийларининг таъкидлашича, бу Ғазодан Исроилга қарши учирилган ракеталарга жавоб бўлган.
Ҳарбийларнинг иддао қилишича, Ғазо секторидан Исроил жанубига ракеталар учирилган, улардан биттаси «Темир гумбаз» ракетага қарши мудофаа тизими томонидан тутиб олинган.
Фаластин—Исроил ўртасидаги янги можарога биринчилардан бўлиб, Иордания қироли Абдулла II муносабат билдирди. У Исроил хавфсизлик кучларининг Қуддусдаги фаластинликларга қарши ҳаракатлари тинчликка таҳдид солаётганини айтди.
Монарх бундай ҳаракатлар минтақада тинчлик ўрнатиш истиқболларига жиддий путур етказишини таъкидлади.
Фаластин—Исроил низоси охирги марта 2021 йилнинг май ойида энг кучли авж олганди. Ўшанда Қуддусдаги араб намойишчилар ва Исроил полицияси ўртасидаги тўқнашувлар юз берган. Вазиятга ҲАМАС аралашган. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлаган. Бунга жавобан Исроил Ғазо секторини ўққа тутган.
Мавзуга доир: Ғолибсиз уруш. Фаластин—Исроил можароси ҳақида
Изоҳ (0)