AQSH shimoli-sharqida kuzatilgan kuchli qor bo‘roni oqibatida chorak milliondan ortiq uy va korxonalar elektr energiyasisiz qoldi, deb xabar beradi Reuters.
Agentlik ma’lumotlariga ko‘ra, Nyu-York shtatidagi 190 mingdan ortiq uy va korxonalar, Pensilvaniyada esa 47 ming xonadon elektrsiz qolgan. Bundan tashqari, Men va Vermont shtatlarida energetika kompaniyalarining 32 ming mijozi ham elektr ta’minotidan uzilgan.
Ta’kidlanishicha, kuchli qor bir necha kundan buyon davom etmoqda, ayrim qirg‘oqbo‘yi hududlarda kuchli to‘lqinlar sabab suv toshqinlari kuzatilgan. Qor bo‘roni boshlangani haqda AQSHning shimoli-sharqiy shtatlari aholisi ogohlantirilgan.
Nyu-Yorkdagi National Grid energetika kompaniyasi o‘z bayonotida brigadalar yetkazilgan zararni baholab, shikastlanish holatlarini bartaraf etayotganini ma’lum qilgan. “Kuchli nam qor davom etmoqda va shamol Nyu-Yorkning markaziy, sharqiy hamda shimoliy qismlarida keng ko‘lamli falokatlarni yuzaga keltirdi”, — deyiladi bayonotda.
AQSH Milliy meteorologiya xizmati (NWS) Pensilvaniya, Vermont va Nyu-Yorkka yana bir necha sentimetr qor yog‘ishini ma’lum qilgan. Shunga qaramay, agentlik ma’lumotlariga ko‘ra, qor to‘planishi qisqa vaqt davom etadi va dam olish kunlari havo harorati 10 darajadan ko‘tariladi.
Eslatib o‘tamiz, yanvar oxirlarida AQSHga kuchli qor bo‘ronlari yopirilayotgani sababli 5 mingga yaqin aviareyslarning bekor qilingandi.
Izoh (0)