Kobuldagi ikkita maktab yaqinida sodir etilgan portlashlar oqibatida 6 kishi halok bo‘ldi

Kobulning g‘arbiy tumanlaridan biridagi ta’lim muassasalari yaqinida kamida uchta portlash sodir bo‘ldi, deb xabar bermoqda Reuters.

Mahalliy matbuotning xabar berishicha, birinchi portlash “Mumtoz” o‘quv markazi yaqinida, so‘ngra yana ikkita portlash Abdul Rahim Shahid o‘gil bolalar o‘rta maktabi yaqinida sodir bo‘lgan.

Afg‘oniston xavfsizlik va sog‘liqni saqlash rasmiylariga ko‘ra, portlashlar oqibatida kamida olti kishi halok bo‘lgan, 11 kishi yaralangan. Rasmiylar qurbonlar soni ortishidan xavotirda.

Reuters agentligining ta’kidlashicha, gap hazoralar jamoasi vakillari — kelib chiqishi aralash shia musulmonlari yashaydigan Dashte-Barchi tumani haqida ketmoqda. Portlash o‘quvchilar maktabdan chiqayotgan paytda sodir bo‘lgan.

Hozircha mintaqada faoliyat yuritayotgan hech bir guruh hodisa uchun javobgarlikni o‘z zimmasiga olmadi.

Avval Kobuldagi shifoxonada portlash sodir etilgani, Afg‘oniston g‘arbidagi Hirot shahrida mikroavtobus portlagani haqida xabarlar berilgan.