Kanada Rossiyaga qarshi sanksiyalar ro‘yxatini kengaytirdi va yana 14 nafar rossiyalik biznesmen hamda amaldorlarga qarshi taqiqlar qo‘lladi. Bu haqda Kanada Tashqi ishlar vazirligi xabar bergan.
- Alfa-bank direktorlar kengashining sobiq rahbari Petr Aven;
- Finstar investitsiya guruhi asoschisi Oleg Boyko;
- “Alfa-Grup” asoschisi Mixail Fridman;
- “Safmar” guruhi direktorlar kengashi raisi Mixail Gutseriyev;
- “Areti” kompaniyalari xalqaro guruhi prezidenti, Rossiya Velosport federatsiyasi prezidenti Igor Makarov;
- Rossiya banki rahbari Elvira Nabiullina;
- Violenchel sozandasi Sergey Roldugin;
- Rossiya banki rahbarining sobiq o‘rinbosari Aleksand Torshin;
- LetterOne investitsiya guruhi direktorlar kengashining sobiq a’zosi German Xan;
- Sheremetyevo aeroporti direktorlar kengashining sobiq rahbari Aleksandr Ponomarenko;
- Katerina Tixonova va Mariya Vorontsova;
- Rossiya tashqi ishlar vaziri Sergey Lavrovning rafiqasi Mariya Lavrova hamda qizi Yekaterina Vinokurova Kanadaning sanksiyalar ro‘yxatiga kiritilgan.
Katerina Tixonova Moskva davlat universitetining murakkab tizimlar ustida matematik tadqiqotlar olib boruvchi institutida direktor o‘rinbosari lavozimida faoliyat olib boradi, shuningdek “Milliy intellektual rivojlanish” fondini boshqaradi, Moskva davlat universitetidagi milliy intellektual zaxira markaziga ham o‘rindoshlik asosida rahbarlik qiladi. Ikkala tuzilma ham “Innopraktika” brendi ustida ish olib boradi.
“Innopraktika” yuqori texnologiyalar sohasidagi ishlanmalar bilan shug‘ullanadi va MDU bazasidagi texnologik vodiy konsepsiyasini amalga oshirish tashabbuskorlaridan hisoblanadi.
Avval Reuters va Bloomberg agentliklari Tixonovani Rossiya prezidenti Vladimir Putinning qizi deb atagandi.
Endokrinolog Mariya Vorontsova — genetik texnologiyalarni ilmiy-texnik rivojlantirishning federal dasturi kengashining a’zosi, endokrinologiya milliy tibbiyot tadqiqot markazining yetakchi ilmiy xodimi va Rossiya yosh endokrinologlar jamiyati raisining o‘rinbosari. BBC’ning rus xizmati Vorontsova Vladimir Putinning to‘ng‘ich qizi ekanligini bildirgan, New Times hamda Reuters agentliklari ham bu haqda xabar bergan.
Ma’lumotlar rasman o‘z tasdig‘ini topmagan va inkor ham etilmagan. 2015-yil dekabr oyidagi matbuot anjumanida Putin xavfsizlik masalalari tufayli oilasini jamoatchilik oldida muhokama qilmasligini ta’kidlagan.
Kanada fevral oyida Vladimir Putin, Sergey Lavrov va Rossiya hukumatining boshqa vakillariga qarshi sanksiyalar qo‘llagan. Shuningdek, Ottava Rossiya kompaniyalari, banklari, jismoniy shaxslar va deputatlarni ham sanksiyalar ro‘yxatiga kiritgan. AQSH, Yevropaning bir qator davlatlari, shu bilan birga Osiyoning ayrim mamlakatlari ham Rossiyaga qarshi sanksiyalar joriy etgan.
Rossiya TIV ushbu sanksiyalarni ochiqchasiga qilinayotgan qaroqchilik harakati deb atagan. Rossiya TIV iqtisodiy hamkorlik departamenti direktori Dmitriy Birichevskiy bir tomonlama sanksiyalardan foydalanilayotgani dunyoning barcha mamlakatlariga ta’sir ko‘rsatishini qayd etgan. Shuningdek, u Rossiyaning javob harakatlariga tayyorligini ma’lum qilgan.
Birichevskiyning so‘zlariga ko‘ra cheklovlarning mualliflari Rossiyaning global iqtisodiyotga qay darajada chuqur integratsiya bo‘lib ketganini tushunmaydi. Tahlilchining qayd etishicha Rossiya korxonalari ishlab chiqarish zanjirlarining halqasiga aylangan va ularni almashtirish juda qiyin.
Izoh (0)