Toshkent shahri Sergeli tumanida 13-aprel kuni ko‘p qavatli bino qurilish maydonidagi kranda yong‘in yuzaga kelgandi.
Qurilish vazirligining ma’lum qilishicha, Sergeli tumani qurilish bo‘limi tomonidan 2020-yil 16-iyulda ko‘p qavatli avtoturargoh, savdo va maishiy xizmat ko‘rsatish hamda sport majmualarini yuridik hujjatga ega bo‘lgan qismini pastki qavatlarida avtoturargoh, savdo va maishiy hamda bolalar bog‘chasi bo‘lgan ko‘p qavatli turar joy binolariga qayta ixtisoslashtirib, rekonstruksiya ishlarini amalga oshirish uchun Simple Town MCHJga ruxsatnoma berilgan.
Ombudsmanni xabardor qilgan holda 2020-yil 6-noyabrda obyektda tekshirish ishlari o‘tkazilgan. Ammo buyurtmachi tomonidan Toshkent shahar qurilish sohasidagi hududiy nazorat inspeksiyasini xabardor qilmasdan qurilish-montaj ishlarini boshlab yuborgani aniqlangan. Ushbu holat yuzasidan talablar belgilangan kunga qadar bartaraf etilmagani sababli 2020-yil 10-dekabrdagi Toshkent shahar Sergeli tuman ma’muriy sudining 3-1011-2002/5142-sonli qarori qabul qilingan. Yana holat yuzasidan inspeksiyadan qayta ko‘rsatmalar berilgan hamda talablar belgilangan kunga qadar bartaraf etilmagani sababli 2021-yil 28-apreldagi Toshkent shahar Sergeli tuman ma’muriy sudining 3-1011-2103/2385-sonli qarori qabul qilingan.
Qurilish obyekti Toshkent shahar Qurilish sohasida hududiy nazorat inspeksiyasini qurilish montaj ishlarini boshlashdan oldin xabardor etmagani tufayli binoning instrumental ijobiy texnik xulosasi olinib, hududiy nazorat inspeksiyasidan o‘rnatilgan tartibda xabardor etish tartibi orqali 2022-yil 5-martda ro‘yxatdan o‘tgan.
Inspeksiya tomonidan 2022-yil 5-aprel kuni qurilish obyektida monitoring ishlari o‘tkazilib, Simple Town MCHJning qurilish ishlari bo‘yicha mas’ul xodimlariga qurilishda yo‘l qo‘yilayotgan kamchiliklar, ijro hujjatlari o‘z vaqtida yuritilmayotgani hamda “Qurilishda xavfsizlik texnikasi”ning qurilish maydonida mehnat muhofazasi hamda texnika xavfsizligi qoidalariga rioya etilishi yuzasidan shaffof qurilish elektron tizim platformasi orqali ko‘rsatmalar berilgan.
Qurilish inspeksiyasi inspektori xabariga ko‘ra, 13-aprel kuni soat 19:04 da Simple Town MCHJga qarashli minora kranining boshqaruv qismi qisman yongan. Yong‘in soat 19:34 da o‘chirilgan. Toshkent shahar Sergeli tumani Favqulodda vaziyatlar boshqarmasi mas’ullarining so‘zlariga ko‘ra, yong‘in elektr simlarida qisqa tutashuv sabab kelib chiqqan bo‘lishi mumkin. Yong‘in oqibatida jabrlangan hamda tan jarohat olganlar yo‘q.
Izoh (0)